NewsKoseli.Com

प्रचण्डको चुनाव खर्च ९ लाख ९४ हजार, चितवनमा अरूले कति–कति खर्चिए ?

पूर्वप्रधानमन्त्री एवं नेकपा (माओवादी केन्द्र) का अध्यक्ष पुष्पकमल दाहाल, ‘प्रचण्ड’ ले प्रतिनिधिसभा सदस्यको निर्वाचनका बेला चितवनमा ९ लाख ९४ हजार ५ सय ४२ खर्च भएको विवरण पेस गरेका छन् ।

पार्टीका सचिवालय सदस्य सूर्य सुवेदी ‘पथिक’ मार्फत प्रचण्डले चुनावी खर्च विवरण पेस गरेको जिल्ला निर्वाचन कार्यालय चितवनका प्रमुख हरि ढकालले जानकारी दिएका हुन् । अध्यक्ष दाहाल चितवन क्षेत्र नम्बर ३ को प्रतिनिधिसभा सदस्य हुन् ।

उनका निकटतम प्रतिद्वन्द्वी राप्रपा (प्रजातान्त्रिक) का उपाध्यक्ष एवम् वनमन्त्री विक्रम पाण्डेको चुनावी खर्च ९ लाख ३९ हजार ९ सय ४० रूपैयाँ पेस भएको निर्वाचन कार्यालयले जनाएको छ । जिल्लाका ३ निर्वाचन क्षेत्रमा कूल ९५ जनाको उम्मेदवारी परेकामा अहिलेसम्म ६७ जनाले निर्वाचन खर्च विवरण पेस गरेको जानकारी ढकालले दिए ।

खर्च विवरण पेस नगर्नेमा साना दलका उम्मेदवार छन् । प्रतिनिधिसभा निर्वाचनमा एक उम्मेदवारले बढीमा २५ लाख रूपैयाँ र प्रदेशसभा सदस्यका उम्मेदवारले १५ लाख रूपैयाँसम्म खर्च गर्न पाउने नियम छ ।

चितवन क्षेत्र नम्बर १ का प्रतिनिधिसभा सदस्य सुरेन्द्र पाण्डेले १३ लाख ५७ हजार ६ सय ७३ रूपैयाँ खर्च भएको भन्दै विवरण पेस गरेका छन् । उनका निकटतम प्रतिद्वन्द्वी कांग्रेस नेता राजेन्द्र बुर्लाकोटीको चुनावी खर्च १६ लाख २९ हजार १ सय ७० रूपैयाँ छ ।

चितवन क्षेत्र नम्बर २ का प्रतिनिधिसभा सदस्य कृष्णभक्त पोख्रेलको चुनावी खर्च १४ लाख ३९ हजार ८ सय रूपैयाँ छ भने उनका निकटतम प्रतिद्वन्द्वी शिक्षा राज्यमन्त्री एवं नेपाली कांग्रेसका नेता शेषनाथ अधिकारीले १३ लाख ९३ हजार रूपैयाँको विवरण बुझाएकाे कार्यालयको तथ्यांकमा उल्लेख छ ।

प्रतिकृया दिनुहोस्

आजको तिथि, मिति र अहिलेको समय

ट्विटरमा न्युजकोसेली

आजको विनिमय दर