NewsKoseli.Com

शिक्षक टिकाउन विद्यालयले गर्‍यो आलुखेती !

 

निजी स्रोतमा राखिएका शिक्षकलाई तलब–भत्ता खुवाउन जुम्लाको एक सामुदायिक विद्यालयले तरकारीखेती गर्दै आएको छ ।

पातारासी गाउँपालिका– ७, पटमारास्थित महारुद्र आधारभूत विद्यालयमा दरबन्दीभन्दा निजी स्रोतका शिक्षक दोब्बर भएपछि तलब–भत्ताको जोहो गर्न विद्यालयले आलुखेती गरेको हो ।

पाँच रोपनीमा आलुखेती गरिएपछि निजी स्रोतमा राखिएका शिक्षक टिकाउन सहज भएको प्रधानाध्यापक चूडाराज न्यौपानेले बताए । उनका अनुसार विद्यालयमा शिक्षक दरबन्दी कम हुँदा निजी स्रोतबाट राख्नुपरेको छ ।

सरकारले दरबन्दीका शिक्षकलाई मात्र तलब–भत्ता उपलब्ध गराउँछ । निजी स्रोतका शिक्षकलाई तलब दिन विद्यालयको अन्य आम्दानीले नपुगेपछि तरकारीखेती गरेर रकम जुटाउनुपरेको उनले बताए ।

प्रधानाध्यापक न्यौपानेले भने– ‘यो क्षेत्रमा आलु उत्पादन राम्रो हुन्छ । आलु बेचेर आएको पैसाले निजी स्रोतमा राखिएका शिक्षकलाई तलब दिन्छौं ।’ आलुखेतीबाट बर्सेनि कम्तिमा २ लाख रुपैयाँ आम्दानी भइरहेको न्यौपानेले बताए ।

‘सडकको पहुँच भएकाले बिक्रीवितरणका लागि बजार पुर्‍याउन सहज छ’, उनले भने– ‘शुक्रबार हुने अतिरिक्त क्रियाकलापमा शिक्षक–विद्यार्थी आलु गोडमेल र संरक्षणमा जुट्छौं । यसले विद्यार्थीलाई व्यावहारिक ज्ञानसँगै विद्यालयको आम्दानीमा सहयोग पुगेको खबर सोमबारको नागरिक दैनिकमा प्रकाशित छ ।

प्रतिकृया दिनुहोस्

आजको तिथि, मिति र अहिलेको समय

ट्विटरमा न्युजकोसेली

आजको विनिमय दर