सिराहाको चोहर्वा – सिराहा सडकखण्ड अन्तर्गत बिहिबार राति मोटरसाइकलको ठक्करबाट १ वृद्धको मृत्यु भएको छ ।
उत्तरबाट दक्षिणतर्फ जाँदै गरेको स ७ प ७०२३ नं को मोटरसाइकलको ठक्करबाट स्थानीय ७० वर्षीय देबुआ सदाको मृत्यु भएको हो । सडक पार गर्ने क्रममा मोटरसाइकलले ठक्कर दिँदा गम्भीर घाइते भएका सदालाई उपचारका लागि विराटनगर लैजाने क्रममा बाटोमै मृत्यु भएको जिल्ला प्रहरी कार्यालय सिराहाले जनाएको छ ।
जङ्गली हात्तीले ४ घर भत्काए
यसैबीच, जङ्गली हात्तीले बिहिबार राती सिराहाको लहान नगरपालिका – १५ स्थित ४ घरमा क्षति पुर्याएकाे छ । जङ्गलबाट आएको जङ्गली हात्तीको समूहले स्थानीय मोहन यादब, बमभोला यादव, शिव यादव र श्याम यादवको फुसको घरमा क्षति पुर्याएको प्रहरीले जनाएको छ ।
हात्तीको समूहले घर पूर्णरुपमा भत्काउनुका साथै घरभित्र भएको अन्नपातसमेत क्षति पुर्याउँदा करिब ३ लाख मूल्य बराबरको क्षति भएको इलाका प्रहरी कार्यालय लहानले जनाएको छ ।
