कमलामाई नगरपालिका– १, डाँडीगुराँसेमा बुधबार डोजर दुर्घटना हुँदा दुई जनाको मृत्यु भएको छ ।
एसके देवीरमण कन्स्ट्रक्सनको वा २ क ३२०५ नम्बरको डोजर दुर्घटना हुँदा त्यसका हेल्पर मिथिला नगरपालिका– १०, लालगढ, धनुषा निवासी अन्दाजी ३० वर्षीय नाम स्पष्ट नभएका एक व्यक्ति र तीनपाटन गाउँपालिका– ४, बागथला, सिन्धुली निवासी २२ वर्षीय कमल बोगटीको मृत्यु भएको जानकारी जिल्ला प्रहरी कार्यालय सिन्धुलीका प्रहरी निरीक्षक जेसी साहले दिएका छन् ।
दुर्घटनामा तीनपाटन गाउँपालिका– ५, लंगुरखोला, सिन्धुली निवासी अन्दाजी २४ वर्षीय गणेश थापा घाइते भएकामा अहिले सिन्धुली अस्पतालमा उपचार हुन नसकेपछि काठमाडौं सिफारिस गरिएको छ । मृतक बोगटी र घाइते गणेश थापा घर बनाउने डकर्मी हुन् ।
बुधबार घर बनाउने काम नभएपछि उनीहरु डाँडीगुराँसे आउने क्रममा तीव्र गतिमा रहेको डोजर सडकबाट करिव २५ फिट तल खसेको थियो । दुर्घटनाको कारण र अवस्थाबारे अनुसन्धान भइरहेको प्रहरीले जनाएको छ ।
