केही दिनदेखि लगातार परेको भीषण वर्षाका कारण घरनजिकै पहिरो गएपछि रामेछापको उत्तरी क्षेत्रमा अवस्थित उमाकुण्ड गाउँपालिकाका ६ घरपरिवार विस्थापित भएका छन् ।
भारी वर्षातका कारण घरमुनिबाट पहिरो गएपछि उमाकुण्ड गाउँपालिका– ५, प्रीतिको चिलाउनेमा २ घर र प्रीतिकै डाँडाखर्कमा १ घर तथा वडा नं. ६, गुप्तेश्वरको डाँडागाउँमा ३ घरपरिवार विस्थापित भएका हुन् ।
विस्थापित परिवारलाई गाउँपालिकाले घरभन्दा केही पर बारीमा अस्थायी रुपमा राखेको छ । पीडितलाई राहतस्वरुप त्रिपाल, खाद्यान्नलगायतका सामग्रीहरु उपलव्ध गराइएको जानकारी उमाकुण्ड गाउँपालिका प्रमुख शेरबहादुर सुनुवारले न्युजकोसेलीलाई दिएका छन् ।
