आइतबार दिउँसो रोल्पाको सुलिचौरस्थित इलाका प्रहरी कार्यालय नजिकै भएको गोली प्रहारबाट तरुण दल रोल्पा नगरपालिकाका अध्यक्ष रोहित पुनको मृत्यु भएको छ ।
सुनील स्मृति गाउँपालिका– ४, सुलिचौरमा रहेको रेस्ट प्वाइन्ट रेस्टुरेन्ट एन्ड बारमा अध्यक्ष पुनलाई गोली प्रहार गरिएको थियो । छातीमा दुई र पेटमा एक गोली लागेका पुनको घटनास्थलमै मृत्यु भएको प्रहरीले बताइएको छ ।
पुनको शव प्राथमिक स्वास्थ्य केन्द्र सुलिचौरमा राखिएको छ । अध्यक्ष पुनमाथि कसले, किन गोली प्रहार गरेको हो भन्ने विषय हालसम्म खुल्न सकेको छैन । गोली प्रहार गर्ने समूहको तीव्र खोजी भइरहेको प्रहरीले बताएको सरकारी समाचार एजेन्सी राससले जनाएको छ ।
