प्रदेश– ३ कासांसद गणेश दुलाल सवार गाडीमा ढुङ्गा प्रहार गरेको आरोपमा महानगरीय प्रहरी वृत्त बौद्धले उदयपुरका २० वर्षीय पासाङ दोर्जे शेर्पालाई पक्राउ गरेको छ ।
सांसद दुलाल सवार बा १९ च ४९८ नम्बरको गाडीमा काठमाडौं महानगरपालिका– ६, बौद्ध, महाङ्काल (पानीट्याङ्की) नजिक सडकमा गुडिरहेकै अवस्थामा सोमबार ढुङ्गा प्रहार गरिएको प्रहरीले जनाएको छ । सांसद दुलाल गाडीमा हिँडिरहेको अवस्थामा शेर्पाले ढुङ्गा प्रहार गरेकाले पक्राउ गरिएको जानकारी महानगरीय प्रहरी कार्यालयकी प्रवक्ता पूजा सिंहले दिएकी छन् ।
ढुङ्गा प्रहारबाट सांसद सवार उक्त गाडीको अगाडिको सिसा चर्केको छ भने सँगै रहेको बा ३ च ९७१९ नम्बरको गाडीको समेत अगाडिको सिसा फुटेको छ । प्रहरीले शेर्पासँगै बा ४४ प २७७१ नम्बरको मोटरसाइकल समेत नियन्त्रणमा लिएको प्रवक्ता सिंहले बताएको राससले जनाएको छ ।
