सत्ताधारी नेपाल कम्युनिस्ट पार्टी (नेकपा) को मेचीनगरका नेता दीपक भण्डारी बुधबार बिहानदेखि सम्पर्कविहीन भएपछि उनको खोजी सुरु भएको छ ।
तत्कालीन नेकपा (एमाले) को मेचीनगर अध्यक्ष, धुलाबारी जेसिसका पूर्वअध्यक्ष, हिमालयन मल्टिपल कलेजका निर्देशकलगायत थुप्रै जिम्मेवारीमा रहनुभएका भण्डारी मेचीनगर– १० स्थित आफ्नै घर नजिकबाट बुधबार बिहान करिव साढे ९ बजेदेखि सम्पर्कविहीन भएको उनकी पत्नी गीता भण्डारीले बताइन् ।
‘हिजो बिहान साढे ९ बजेतिर कलेज जान्छु भनेर घरबाट बाहिर निस्कनुभएको थियो, त्यसपछि उहाँसँग सम्पर्क हुनसकेको छैन’– गीताले भनिन् । उनका अनुसार भण्डारीले आफ्नो मोटरसाइकल र २ थान मोबाइल घरमै छाडेका छन् । भण्डारी बुधबार बिहान ८ बजेतिर घर नजिकै रहेको हिमालयन मल्टिपल कलेजमा आएर फर्किएको कलेजका सञ्चालक भाष्कर निरौलाले बताए ।
उनी सम्पर्कविहीन भएको खबर आएलगत्तै खोजीका लागि प्रहरी परिचालन गरिएको जानकारी जिल्ला प्रहरी कार्यालयका प्रहरी नायब उपरीक्षक महेन्द्रकुमार श्रेष्ठले दिए । भण्डारीको मोबाइलको कल डिटेल लिने र उनीसँग आर्थिक कारोबार भएकाहरुसँग बुझ्ने कार्य भइरहेको जानकारी प्रहरी नायब उपरीक्षक श्रेष्ठले दिएको राससले जनाएको छ ।
