भङ्गाहा नगरपालिका– २ स्थित सिंग्याही बजारमा आमाछोरा चढेको मोटरसाइकल शनिबार साँझ दुर्घटना हुँदा आमाको मृत्यु हुनुका साथै छोरा गम्भीर घाइते भएका छन् ।
दुर्घटनामा परी भङ्गाहा नगरपालिका– २, बखरी बस्ने ४० वर्षीया लक्ष्मीनियादेवी सिंहको मृत्यु भएको हो जिल्ला प्रहरी कार्यालयका प्रहरी नायब उपरीक्षक खगेन्द्रबहादुर खड्काले बताए । दुर्घटनाका क्रममा उनका १६ वर्षीय छोरा मनिष सिंह गम्भीर घाइते भएका छन् ।जनकपुर अञ्चल अस्पतालमा उनको उपचार भइरहेको छ ।
शनिबार साँझ करिव ६ बजे बखरीबाट ज ८ प ५४४५ नम्बरको मोटरसाइकल चढेर सिंग्याही बजार गएलगत्तै बजारमै मोटरसाइकल दुर्घटना हुँदा आमाछोरा दुवै गम्भीर घाइते भएका थिए ।
घाइते दुवैमध्ये बढी गम्भीर आमा लक्ष्मीनियादेवी सिंहलाई उपचारका लागि काठमाडौं लैजाँदै गर्दा बाटोमा मृत्यु भएको प्रहरी नायब उपरीक्षक खड्काले बताएको राससले जनाएको छ ।
