मध्यपुर थिमी– २, सानोठिमीस्थित वन कार्यालयको ओरालोमा बिहीबार दुई वटा मोटरसाइकल एकापसमा ठोकिएर लडेका बेला विपरीत दिशातर्फबाट आइरहेको बसले ठक्कर दिँदा मोटरसाइकल चालकको मृत्यु भएको छ ।
पेप्सीकोलाबाट सानोठिमीतर्फ आउँदै गरेको बा ७४ प ५५३ नम्बरको मोटरसाइकलले विपरीत दिशातर्फ जाँदै गरेको प्रदेश– ३–०२–००२ प ६३ नम्बरको मोटरसाइकललाई ठक्कर दिँदा मोटरसाइकल सडकमा लडेको थियो । विपरीत दिशातर्फबाट आउँदै गरेको बा. २ ख ४८६८ नम्बरको बसले समेत ठक्कर दिँदा प्रदेश ३–०२–००२ प ६३ नम्बरको मोटरसाइकलका चालक देउपुर– ३, काभ्रेपलाञ्चोक घर भई मध्यपुर– ९, बोडे बस्ने २४ वर्षीय सन्तोष राईको मृत्यु भएको महानगरीय प्रहरी परिसर भक्तपुरका निमित्त सूचना अधिकृत प्रहरी निरीक्षक सुशील पाण्डेले जानकारी दिए ।
प्रहरीले सवारी साधन सहित काठमाडौं महानगरपालिका– ३२, पेप्सीकोला बस्ने २४ वर्षीय मोटरसाइकल चालक अरुणकुमार श्रेष्ठ र सिन्धुपाल्चोकको बलेफी– ३ घर भई पुरानो थिमी बस्ने २४ वर्षीय बस चालक ताराबहादुर तामाङलाई नियन्त्रणमा लिएको छ ।
करेन्ट लागेर छुक्काको मृत्यु
भक्तपुर नगरपालिका गोलमढीमा करेन्ट लागेर बिहीबारै अर्का एक जनाको ज्यान गएको छ । करेन्ट लागेर सूर्यविनायक नगरपालिका– ८, आदर्शचोक बस्ने ४२ वर्षीय गोविन्दप्रसाद छुक्काको ज्यान गएको हो ।
प्रहरीका अनुसार भगोलमढीस्थित केशव कवाङको घरको माथिल्लो तल्लामा बिजुली मर्मतका क्रममा करेन्ट लागेर घाइते भई उपचारका लागि भक्तपुर अस्पतालमा लगिएका छुक्काको मा उपचारकै क्रममा मृत्यु भएको हो । घटनाबारे अनुसन्धान भइरहेको प्रहरीले जनाएको खबर राससले प्रेषित गरेको छ ।
