बाँकेको कोहलपुर नगरपालिका– ३, मदनचोकस्थित पूर्व–पश्चिम राजमार्गमा स्कारपियो जिपको ठक्करबाट शनिबार दुई जनाको मृत्यु भएको छ ।
दुर्घटनामा बर्दियाको ठाकुरद्वारा नगरपालिका– ८ निवासी ३२ वर्षीया उषा चौधरी र बाँके बैजनाथ गाउँपालिका– १, चिसापानी निवासी ३० वर्षीय लोकबहादुर शाहीको मृत्यु भएको इलाका प्रहरी कार्यालय कोहलपुरका प्रहरी निरीक्षक मानबहादुर बीसीले जानकारी दिए ।
उनका अनुसार मृतक दुवै स्कुटी चालक हुन् । शुक्रबार राति पूर्व–पश्चिम राजमार्गअन्तर्गत मदनचोक नजिकै चौधरी र शाहीले चलाएको भे ५ प १४२० र भे ८ प २१६५ नम्बरको स्कुटी एक–आपसमा जुधेका बेला तीव्र गतिमा आएको बा १५ च २०९६ नम्बरको स्कारपियोले दुवै जनालाई ठक्कर दिएको थियो ।
दुर्घटनामा गम्भीर घाइते भएका दुवै जनाको कोहलपुरस्थित शिक्षण अस्पतालमा उपचारका क्रममा मृत्यु भएको प्रहरी निरीक्षक बीसीले जानकारी दिए । चालक रोशन वलीलाई प्रहरीले नियन्त्रणमा लिएको खबर राससले प्रेषित गरेको छ ।
