चितवनमा सोमबार बिहानै तीन वटा सवारी साधन एकापसमा ठोक्किँदा एक जनाको मृत्यु भएको छ ।
पृथ्वी राजमार्गअन्तर्गत इच्छाकामना गाउँपालिका– ४, कुरिनटारस्थित सर्वशान्ति मावि परीक्षा केन्द्रमा एसईई परीक्षा दिने विद्यार्थी बोकेर मुग्लिनबाट आउँदै गरेको बा ३ ख ७९९३ नम्बरको यात्रुबाहक बसमा सोही दिशाबाट आएको ना ४ च ३२९० नम्बरको डेलिभरी भ्यान र बा ९० प ८१३२ नम्बरको मोटरसाइकल बिहान ७ः३० बजे एकापसमा ठक्कर खाँदा धादिङ ज्यामरुङका ३५ वर्षीय राजन धमलाको मृत्यु भएको जिल्ला ट्राफिक प्रहरी कार्यालय चितवनका प्रमुख चन्द्रकुमार गिरीले जानकारी दिएका छन् ।
उपचारका क्रममा बिहान १० बजे धमलाको मृत्यु भएको गिरीले बताए । दुर्घटनामा भ्यानका चालक सामान्य घाइते भएका छन् । दुर्घटनाको कारणबारे अनुन्धान भइरहेको जानकारी प्रहरीले दिएको खबर राससले प्रेषित गरेको छ । तस्बिरः हिरालाल गुरुङ/रासस
