नेपालमा फेरि एकै दिन कोरोनाभाइरस (कोभिड– १९) का दस संक्रमित थपिएका छन् । हालसम्म ५९ जना संक्रमित रहेकामा आइतबार एकै दिन यो संख्या ६९ पुगेको छ ।
आइतबार दिउँसो वीरगञ्ज महानगरपालिका– ३, छपकैयाका ३६ वर्षीय पुरुषमा कोरोना संक्रमण फेला परेको नारायणी अस्पतालका मेडिकल सुपरिटेन्डेन्ट डा. मदन उपाध्यायले पुष्टि गरेका थिए । त्योसँगै कोरोना संक्रमितको संख्या ६० पुगेको थियाे ।
लगत्तै आइतबार साँझपख बाँकेको नेपालगञ्जमा ९ जनामा कोरोनाभाइरस (कोभिड– १९) को संक्रमणको पुष्टि भयो । यससँगै संक्रमितको संख्या आइतबार (२१ वैशाखमा) एकै दिन ५९ बाट ६९ पुगेको छ ।
नेपालगञ्जमा गरिएको परीक्षणमा ५ पुरुष र ४ महिला गरी ९ जनामा संक्रमण पुष्टि भएको र उनीहरु ७ देखि ५८ वर्ष उमेरका रहेको स्वास्थ्य तथा जनसंख्या मन्त्रालयका प्रवक्ता डा. विकास देवकोटाले जनाएका छन् ।
