प्रसिद्ध धार्मिकस्थल पाथीभरामा साउनदेखि पुस मसान्तसम्म ६ महिनाको अवधिमा दर्शन गर्न आउने भक्तजनबाट १ करोड ३० लाख २४ हजार ४ सय ५६ रुपैयाँ भेटी र दान सङ्कलन भएको छ ।
पाथीभरा क्षेत्र विकास समितिका अनुसार सोही अवधिमा १ लाख ६ हजार ६ सय २३ जना भक्तजनले मन्दिरको दर्शन गरेका छन् । भेटी र दानबाट सङ्कलित रकम पाथीभराको संरक्षण, सम्वर्द्धन तथा दर्शनार्थीलाई थप सुविधा उपलब्ध गराउन र पूर्वाधार निर्माणलगायतका काममा खर्च हुँदै आएको पाथीभरा क्षेत्र विकास समितिका कार्यकारी निर्देशक प्रजिन हाङबाङले बताए ।
चालु आर्थिक वर्षको ६ महिनाको भेटीघाटी तथा दर्शनार्थीको सङ्ख्या समितिले हालै सार्वजनिक गरेको हो । पाथीभरा क्षेत्र धार्मिक आस्थाको केन्द्र भएकाले यहाँ हरेक वर्ष लाखौं भक्तजन आउने गर्दछन् । पाथीभरा धाम नेपालका प्रमुख शक्तिपीठमध्ये पूर्वकै एक प्रसिद्ध तीर्थस्थल हो । पाथीभरामा विशेषगरी बडादसैं, तिहार, चैतेदसैं र अन्य चाडपर्वका बेला भक्तजनको उल्लेख्य उपस्थिति हुने गर्छ ।
पाथीभरा देवीको दर्शनले मनोकाङ्क्क्षा पूरा हुने जनविश्वास छ । दर्शनार्थीको बढ्दो चापलाई व्यवस्थित गर्न समितिले नयाँ संरचना र सेवा सुधारका योजना क्रमशः सञ्चालन गरिरहेको छ । पाथीभरा क्षेत्रमा खानेपानी, पदमार्गमा शौचालय व्यवस्थापन, विभिन्न गाउँबाट पाथीभरा जाने पदमार्ग निर्माण, पूजास्थलका साथै मन्दिर परिसर व्यवस्थापन, मन्दिर परिसरमा वृक्षारोपण, पर्यटक प्रहरी पोस्टको स्थापना, पार्किङस्थलको निर्माणलगायतका कार्य गर्दै आएको समितिले जनाएको छ ।
