काठमाडौं महानगरपालिका– ९, सेतोपुल नजिकै अवस्थित टहरामा जुवातास खेलिरहेको अवस्थामा सिन्धुली घर भई सिनामंगल, काठमाडौं बस्ने २९ वर्षीय लोकबहादुर चौहानलगायत १४ जनालाई प्रहरीले पक्राउ गरेको छ । प्रहरी वृत्त गौशालाबाट खटिएको प्रहरीले उनीहरूलाई नगद ६७ हजार ७ सय रूपैयाँ र १ बुक ताससहित बिहीबार बेलुका पक्राउ गरेको हो ।

यसैगरी, बुढानिलकण्ठ नगरपालिका– २, काठमाडौंस्थित पञ्चकन्या सामुदायिक वनको चौरमा जुवा (ओखर) खेलिरहेको अवस्थामा ओखलढुङ्गा घर भई सुन्दरीजल, काठमाडौं बस्ने २६ वर्षीय लालकाजी सेन्चुरीलगायत १० जनालाई प्रहरीले पक्राउ गरेको छ । प्रहरी प्रभाग बुढानिलकण्ठबाट खटिएको प्रहरीले उनीहरूलाई नगद १ लाख ६७ हजार ७ सय ४५ रूपैयाँ र १५ थान ओखरसहित बिहीबार दिउँसो पक्राउ गरेको हो ।

दुवै स्थानबाट पक्राउ परेकाहरुबारे प्रहरीले अनुसन्धान गरिरहेको प्रहरी प्रधान कार्यालयस्थित केन्द्रीय प्रहरी समाचार कक्षले शुक्रबार जनाएको छ ।