सरकारले प्रदान गर्ने सस्तो ब्याजदरको सहुलियत ऋण किसानले अहिलेसम्म पाउन सकेका छैनन् । सहुलियत ब्याजदरमा कृषि ऋण पाउन नसकेको किसानको गुनासो छ ।
मदनपोखराका सुकदेव रिजाल ३ पटकसम्म वाणिज्य बैंकमा ऋण लिन पुगे पनि ऋण नपाएको बताउँछन् । “पटक–पटक धाए पनि वाणिज्य बैंकले पत्याएको छैन,” उनले भने ।
कृषि ऋण नपाउँदा किसान महँगो ब्याजदरमा जग्गा धितो राखेर निजी क्षेत्रका बैंकबाट ऋण निकाल्न बाध्य भएका छन् । सरकारले ३ वर्षअघि किसानलाई सस्तो ब्याजदरमा कृषि ऋण दिने घोषण गरेको थियो ।
सरकारले घोषणा गरे पनि कृषि ऋण प्रवाहका लागि बैंकलाई नीतिगत समस्या भएको वाणिज्य बैंकका शाखा प्रबन्धक मित्रलाल नेपालीले बताए ।
ग्रामीण क्षेत्रका किसानसित प्रशस्त मात्रामा धितो राख्ने जग्गा छैन । फर्म र बीमाका आधारमा ऋण दिनुपर्ने किसानको माग छ । तर, प्रबन्धक नेपालीले नीतिगत समस्या समाधान भए सस्तो ब्याजदरमा ऋण प्रवाह गर्न सकिने बताए ।
