थाइल्याण्डमा जारी आर्इसीसी महिला टी–ट्वेन्टी विश्वकप एशिया छनोटमा नेपालले मलेसियालाई पराजित गर्दै प्रतियोगितामा पहिलो जित दर्ता गराएको छ ।
बैंककस्थित एशियन इन्स्टिच्युट अफ टेक्नोलोजीको मैदानमा शुक्रबार भएको चौथो खेलमा नेपालले मलेसियालाई ३३ रनले पराजित गर्दै प्रतियोगितामा पहिलो जित दर्ता गराएको हो । यसअघि नेपालले खेलेका ३ खेलमध्ये २ खेल वर्षाले प्रभावित भएका थिए भने १ खेलमा नेपाल पराजित भएको थियो ।
टस हारेर पहिले ब्याटिङको निम्तो पाएको नेपालले निर्धारित २० ओभरमा ६ विकेट गुमाउँदै १०८ रनको योगफल बनायो । जवाफी ब्याटिङमा उत्रेको मलेसिया २० ओभरमा सात विकेट गुमाउँदै ७५ रनमा समेटियो । यस जितसँगै ४ खेल खेलेको नेपालको ४ अंक नै छ ।
नेपालले थाइल्याण्ड र हङ्कङसँग वर्षाका कारण अंक बाँडेको थियो भने संयुक्त अरब इमिरेट् ९युएई० सँग पराजित भएको थियो ।
नेपालको जितमा सीता रानामगरले सर्वाधिक ३७ रनको योगदान दिइन् । ४२ बल खेलेकी उनले तीन चौकाको मद्धतमा ३७ रन जोडेकी हुन् । त्यस्तै ज्योति पाण्डेले २१ तथा काजोल श्रेष्ठले १८ रन जोडे ।
मलेसियाकी जनादिह हालिम र नुर अरियना नत्स्याले समान २–२ विकेट लिइन् । मलेसियाका लागि भने एमएली एलिएनीले २४, कप्तान डब्लु ए दुरासिंगमले ११ तथा जायनी स्यामिमीले १६ रन जोडे ।
मलेसियालाई ७५ रनमा समेट्ने क्रममा नेपालकी करुणा भण्डारी एक्लैले ३ विकेट लिइन् भने सोनु खड्का, सीता रानामगर, रीतु कनौजिया र नेरी थापाले समान १–१ विकेट लिए । मंसिर १० मा नेपालले चीनसँग खेल्नेछ ।
