‘आइसोलेसन वार्ड’ स्थापना गर्न भक्तपुर नगरपालिकाले नगर क्षेत्रभित्र सञ्चालनमा रहेका ६ वटा अस्पताललाई आग्रह गरेको छ । जिल्लामा सञ्चालनमा रहेका भक्तपुर अस्पताल, भक्तपुर क्यान्सर अस्पताल, सहिद धर्मभक्त अङ्ग प्रत्यारोपण केन्द्र, डा. इवामुरा मेमोरियल अस्पताल, सिद्धि स्मृति महिला तथा बाल अस्पताल र जनस्वास्थ्य केन्द्रलाई कोरोना भाइरस (कोभिड– १९) का सङ्क्रमित भेटिएमा स्वास्थ्य परीक्षण गर्न छुट्टै शय्याको व्यवस्था गर्न नगरपालिकाले पत्राचार गरेको छ ।
कोभिड– १९ को सङ्क्रमण विश्वव्यापी रुपमा फैलिइरहेको र छिमेकी मुलुकमा समेत यसको प्रभाव बढ्दै जाँदा नेपाल पनि उच्च जोखिममा रहेको ठहर गर्दै यसको सङ्क्रमणप्रति सजगता, रोकथाम तथा नियन्त्रणका लागि नगरपालिका क्षेत्रभित्र रहेका सबै अस्पताल र स्वास्थ्य केन्द्रमा उपलब्ध क्षमतालाई ध्यानमा राखी आकस्मिक अवस्थामा प्रयोग गर्न सकिने गरी आवश्यक न्यूनतम मात्रामा छुट्टै शय्याको व्यवस्था मिलाउन नगरपालिकाले अस्पताललाई पत्राचार गरेको जानकारी नगरप्रमुख सुनील प्रजापतिले दिएका छन् ।
भक्तपुरमा कोरोना सङ्क्रमित व्यक्ति भेटिए बिरामीको प्रारम्भिक जाँच, परीक्षण गर्ने र सघन जाँच तथा परीक्षण गर्नुपर्ने देखिएमा प्रादेशिक तथा केन्द्रीय अस्पतालमा सिफारिस गरी पठाउने व्यवस्था गर्न तथा कोभिड– १९ को सङ्क्रमण, यसको रोकथाम र नियन्त्रणका लागि स्वास्थ्य सचेतनासम्बन्धी कार्यक्रम सञ्चालन गर्न अनुरोध गरिएको उनले जानकारी दिएको खबर राससले प्रेषित गरेको छ ।
