समानुपातिकमा माओवादीबाट क–कसले पाइसके अवसर ? (नामावलीसहित)

अन्तरिम संविधान जारी भएर २०६४ मा सम्पन्न भएको पहिलो संविधानसभायता केन्द्रीय संसदमा दुई किसिमबाट प्रतिनिधि चयन भएर आउने गरेका छन्– पहिलो हुने निर्वाचित हुने र दलले पाएको मतका आधारमा समानुपातिकरूपमा चयन गरिने ।

२०७२ मा ‘नयाँ’ संविधान जारी भएयता पनि त्यो क्रम जारी नै छ । २०७४ यता त प्रतिनिधिसभामा मात्र नभई प्रदेशसभामा समेत प्रत्यक्ष निर्वाचित एवम्र समानुपातिक दुवै विधिबाट प्रतिनिधिहरू चयन हुँदै आएका छन् ।

४ मंसिर, २०७९ मा एकैसाथ र एकै चरणमा प्रतिनिधिसभा तथा प्रदेशसभा निर्वाचन हुने भएको छ । मंसिरमा हुने चुनाव ‘नयाँ’ संविधान जारी भएयताको दोस्रो चुनाव हो ।

लाखौंलाख जनता, हजारौं कार्यकर्ता र सयौं नेताको त्याग, मेहनत र बुद्धि–विवेकका आधारमा कुनै पनि दलले हजारौं हजार मत प्राप्त गर्ने गरेको हो । पहिलो हुने निर्वाचित हुने अर्थात प्रत्यक्ष निर्वाचित हुने क्षेत्रमा त उम्मेदवारको व्यक्तित्व र लोकप्रियताको समेत धेरथोर प्रभाव र भूमिका हुन्छ तर समानुपातिक मतचाहिँ दलकै लोकप्रियता र बलबुतामा मात्रै प्राप्त हुने हो ।

यस्तो मतका आधारमा चयन हुने ‘माननीय’ को स्थानमा पार्टीभित्र कब्जा जमाउन सफल भएका सीमित ‘सम्भ्रान्त’, ‘पहुँचवाला’ र‘ शक्तिशाली’ हरूले नाजायज लाभ लिने गरेको जनगुनासो बढ्दै जान थालेको छ । अझ समानुपातिक जस्तो ‘कोटा’ मा एकै व्यक्तिले पटक–पटक दोहोर्‍याएर समेत अवसर लिने गरेका छन् । यस्तो रवैयाप्रति भने दलभित्रै चर्को विरोध र असन्तुष्टि देखिन्छ, जुन स्वाभाविक पनि हाे ।

सामान्य न्यायका हिसाबले पनि अस्वाभाविक, असंगत र अपाच्य हुने यस्ता गतिविधि आसन्न चुनावमा भने नदोहोर्‍याउने घोषणा कांग्रेस र एमालेले गरिसकेका छन् । माओवादी केन्द्र भने यो मामिलामा अझैसम्म पनि मौन नै छ । यसै सन्दर्भमा माओवादीका तर्फबाट यसअघि नै समानुपातिक कोटाको लाभ पाइसकेकाहरूको नामावली यहाँ प्रस्तुत गरिएको छ ।