पहाडी क्षेत्रसँगै तराईका विभिन्न जिल्लामा विषालु र विषालु नभएका सर्पदंशबाट पीडित भएर आउनेको सङ्ख्या दैनिक सरदर पाँच जनाभन्दा बढी हुने गरेको सामुदायिक सर्पदंश उपचार केन्द्र सञ्चालक समितिका अध्यक्ष दिवश पोख्रेलले बताए ।
अध्यक्ष पोख्रेलका अनुसार जेठ महिनाको २९ गतेसम्म सामुदायिक सर्पदंश उपचार केन्द्रमा एक सय ३५ जना सर्पदंशका पीडितले उपचार सेवा पाएका छन् । वैशाख महिनामा ९४ जना सर्पदंशका पीडितले उपचार सेवा पाएका थिए । उता जिल्ला अस्पताल इनरुवामा पनि वैशाख र जेठ महिनामा १५ जना सर्पदंशका पीडितले उपचार सेवा लिइसकेको अस्पतालले जानकारी दिएको छ ।
सर्पदंशका पीडितमध्ये अझै चार जनाको सामुदायिक सर्पदंश उपचार केन्द्रमा उपचार भइरहेको छ । यस सामुदायिक सर्पदंश उपचार केन्द्रमा सुनसरीसँगै झापा, मोरङ, भोजपुर, तेह्रथुमलगायतका जिल्लाबाट सर्पदंशका पीडित उपचारका लागि आउने गरेका छन् ।
अन्यत्रभन्दा नेपाली सेनाको निगरानीमा रहेको सामुदायिक सर्पदंश उपचार केन्द्रले विश्वसनीय सेवा दिन्छ भन्ने विश्वासका आधारमा पूर्वका प्रायः सबै स्थानका सर्पदंशका बिरामी यही उपचारका लागि आउने गरेको अध्यक्ष पोख्रेलले बताए ।
पहाडी क्षेत्रमा खासगरी जङ्गलमा पाइने हरियो भाइपर प्रजातिको सर्पले डसेका पीडित आउने गरेको र यो महिनामा पनि १० जना आएकामध्ये सात जना पहाडी क्षेत्रका रहेको पनि केन्द्रले आँकडा दिएको छ । तराईमा गोमनले डसेका पीडित आउँछन् भने पहाडी क्षेत्रमा भने हरियो भाइपर नामक सर्पको डसाइका पीडित आइरहेको केन्द्रको भनाइ रहेको छ ।
सामुदायिक सर्पदंश उपचार केन्द्रमा सर्पदंशका पीडितको उपचारका लागि १६ श्यया रहेको र सर्पको डसाइबाट ज्यादै पीडित भई भेन्टिलेटरमा राख्नुपर्ने अवस्थाका बिरामीलाई भने बिपी कोइराला स्वास्थ्य विज्ञान प्रतिष्ठानमा पठाउने गरेको पनि केन्द्रले बताएको छ ।
यस केन्द्रले सर्पदंशका पीडितको निःशुल्क उपचार गर्दै आएको र एन्टी स्नेक भेनम औषधि पनि निःशुल्क उपलब्ध गराउँदै आएको छ । तर अरु औषधि प्रयोग गर्नुपर्ने अवस्था सिर्जना भए त्यो भने बिरामी आफैँले व्यहोर्नुपर्ने हुन्छ । रासस
