विपदको समयमा मानवीय उद्धारमा खटिँदा बहुराष्ट्रिय सेनाबीच सम्पर्क कायम गरी सूचना प्रवाहलाई कसरी व्यवस्थित तुल्याउन सकिन्छ भन्ने उद्देश्यले राजधानीमा सोमबारदेखि २० मुलुकका उच्च सैनिकको अभ्यास सुरु भएको छ ।
अमेरिकी सेनाको प्रशान्त क्षेत्र कमान्डको सहयोगमा नेपाली सेनाद्वारा आयोजित उक्त अभ्यासमा आ–आफ्ना देशका सैनिकले सञ्चालनमा ल्याएका दूरसञ्चार (सिग्नल) मार्फत बहुराष्ट्रिय सेनाबीच विपदका समयमा सम्पर्क र समन्वय गरी मानवीय कार्यलाई प्रभावकारी तुल्याउनेबारे सैद्धान्तिक र व्यावहारिक अभ्यास हुनेछ ।
अभ्यासमा विभिन्न मुलुकका उपरथी तहसम्मका २ सय ७५ सैनिकको सहभागिता छ । सन् २००५ मा जापानमा आएको सुनामीपछि ठूलाखाले प्राकृतिक प्रकोपका घटनाका बेलामा उद्धारमा खटिएका बहुराष्ट्रिय सेनाको जिम्मेवारी र मानवीय उद्धार कार्यलाई व्यवस्थित तुल्याउन सैनिकले प्रयोग गर्ने दूरभाष यन्त्रलाई समयानुकूल बनाउन यस्ता कार्यले निकै ठूलो सहयोग पुग्ने विश्वास गरिएको छ ।
भूकम्प, सुनामीजस्ता ठूलाखाले विपदका घटना आएर सम्बन्धित मुलुकको दूरसञ्चार प्रणाली अवरुद्ध भएको समयमा सहयोग र सम्पर्क आदान–प्रदान गर्न सैनिकले सञ्चालन गर्ने फ्रिक्वेन्सी निकै प्रभावकारी सावित हुँदै आएको छ । चौधदिने सो अभ्यासमा नेपाल, अष्ट्रेलिया, बंगलादेश, कम्बोडिया, फिजी, फ्रान्स, इन्डोनेसिया, जापान, मंगोलिया, माल्दिभ्स, मलेसिया, फिलिपिन्स, सिंगापुर, श्रीलंका, थाइल्यान्ड, टोगो, भियतनाम, दक्षिण कोरिया, पपुवा न्युगिनी र अमेरिका सहभागी छन् ।
स्थलगतरुपमा प्राप्त गरिएको ज्ञानका आधारमा नेपाली सेनाले २०७२ वैशाख १२ गते गोरखाको बारपाक केन्द्रविन्दु भएर गएको भूकम्पका समयमा बहुराष्ट्रिय सेनासँग आफनो सिग्नलमार्फत सम्पर्क, सहयोग र समन्वय प्रभावकारी ढंगबाट गरेको थियो । विश्वमा सूचना र प्रविधिको क्षेत्रमा के–कस्तो विकास भइरहेको छ भन्ने बारेमा जानकारी हासिल गर्न सहयोग पुग्ने यो कार्यक्रम नेपालमा दोस्रो पटक आयोजना गरिएको हो ।
तीन पटक योजना बनाएर त्यसका आधारमा वार्षिक रुपमा यस्ता अभ्यास विभिन्न मुलुकमा गरिन्छ । कार्यक्रमको उदघाटन गर्दै युद्धकार्य महानिर्देशक उपरथी प्रभुराम शर्माले प्राकृतिक विपदको समयमा हुन सक्ने मानवीय क्षतिलाई रोक्न र उद्धार कार्यलाई प्रभावकारी तुल्याउन बहुराष्ट्रिय सेनाबीच सहयोग र सम्पर्क कायम राख्न सहयोग पुर्याउने यस्ता अभ्यास निकै अर्थपूर्ण रहने धारणा व्यक्त गरे ।
नेपालमा २०७२ को भूकम्पका बेला बहुराष्ट्रिय सेनाबाट भएको उद्धार, सहयोग र समन्वयको स्मरण गराउँदै विपदका बेला सेनाबीच सूचना आदान–प्रदान र सही व्यवस्थापनको खाँचो भएको उनले बताए । अमेरिकी सेनाका कृष्टी विल्सनले विपदको समयमा बहुराष्ट्रिय सेना परिचालन हुँदा मानवीय सहायता कार्यलाई निकै परिणाममुखी तुल्याउन सकिने धारणा व्यक्त गरे ।
