सत्ताधारी नेपाल कम्युनिस्ट पार्टी (नेकपा) का प्रवक्ता नारायणकाजी श्रेष्ठले आफूले प्राप्त गर्ने एक वर्षको पारिश्रमिक (तलब) विपन्न वर्गकेन्द्रित राहत प्याकेजमा दिने घोषणा गरेका छन् ।
संसदीय चुनावमा हारेका नारायणकाजी भर्खरै राष्ट्रियसभा सदस्य बनेका छन् । नेता श्रेष्ठले सोमबार सामाजिक सञ्जाल ‘ट्विटर’ मार्फत सो जानकारी गराएका हुन् । राष्ट्रियसभा सदस्यका रुपमा प्राप्त गर्ने दुई महिनाको पारिश्रमिक सरकारले स्थापना गरेको कोभिड– १९ राहत कोषमा जम्मा गर्ने र बाँकी १० महिनाको विपन्नकेन्द्रित राहत प्याकेजमा दिने उनले उल्लेख गरेका छन् ।
श्रेष्ठले लेखेका छन्– ‘हामी अहिले कोभिड– १९ र उत्पन्न सङ्कटको सामाना गरिरहेका छौं । यसबेला एकताबद्ध भई आ–आफ्नो ठाँउबाट भूमिका खेल्नु जरुरी छ । यस स्थितिमा राष्ट्रियसभा सदस्यको एक वर्षको पारिश्रमिकमध्ये २ महिनाको कोभिड– १९ कोष र बाँकी विपन्न वर्गकेन्द्रित आर्थिक राहत प्याकेजका लागि दिने घोषणा गर्दछु ।’
यस्तो छ श्रेष्ठको ‘ट्विट’, जस्ताको तस्तै–
हामी अहिले कोभिड-१९ र उत्पन्न सँकटको सामना गरिरहेका छौं।यसबेला एकताबध्द भई आ-आफ्नो ठाँउबाट भुमिका खेल्नु जरुरी छ।
यस स्थितिमा मैले राष्ट्रिय सभा सदस्यको एक बर्षको पारिश्रमिक मध्ये २ महिनाको कोभिड-१९ कोष र बाँकी बिपन्न बर्ग केन्दृत आर्थिक राहात प्यकेजका लागि दिने घोषणा गर्दछु।
— NKShresthaPrakash (@nksthaprakash) April 13, 2020
