प्रतिनिधिसभाको बैठकले शनिबार दुईतिहाईभन्दा बढी मतद्वारा नेपालको संविधानको दोस्रो संशोधन विधेयक, २०७७ पारित गर्ने क्रममा केही सांसद गयल भए भने केही उपस्थित भएर मतदान गर्न नपाउने अवस्थामा रहे ।
प्रतिनिधिसभा नियमावलीअनुसार मतविभाजनबाट संशोधन विधेयक पास गराउने क्रममा २७५ सदस्यीय प्रतिनिधिसभामा २५८ सांसदले मतदान गरे र सबै मत प्रस्तावको पक्षमा नै परे । प्रतिनिधिसभाको शनिबारको बैठकमा उपस्थित सबै सांसदले प्रस्तावको पक्षमा नै मतदान गरे । सांसद सरिता गिरी भने बैठकमा आएर पनि मतदान गर्ने बेलामा ‘बहिष्कार’ गरी बाहिर निस्किइन् ।
तर, केही सांसदहरू भने सो बैठकमा उपस्थित नै नभई नयाँ नक्साको पक्षमा मतदान गरेनन् । अमृतादेवी अग्रहरि, गोपालबहादुर बम, दुलारीदेवी खत्वेनी, धनबहादुर बुढा, नागेन्द्रकुमार चौधरी, प्रमोद साह, शिवकुमार मण्डल, सूर्यनारायण यादव, सूर्यबहादुर केसी, हरिबोलप्रसाद गजुरेल र ज्ञानकुमारी छन्त्याल नयाँ नक्साको पक्षमा मतदान गर्ने शनिबारको बैठकमा अनुपस्थित (गयल) रहे ।
सांसदहरु हरिनारायण रौनियार, रेशम चौधरी, मोहम्मद अफ्ताब आलम र विजयकुमार गच्छदार भने निलम्बित रहेकाले उनीहरु यतिबेला संसदमा उपस्थित हुनै पाउँदैनन्, पाएनन् ।
सभामुखले विधेयककाे पक्ष–विपक्षमा मतदान नगर्ने परम्पराअनुसार सभामुख अग्निप्रसाद सापकाेटाले मतदान गरेनन् । यसरी १ सभामुख, ४ निलम्बित, १ ‘बहिष्कारवादी’ र ११ गयल गरी १७ जनाले मतदान नगर्दा कूल २७५ सदस्यीय प्रतिनिधिसभामा २५८ जनाले मात्र मतदान गरे र सबै मत प्रस्तावकाे पक्षमा नै परे ।
यो पनि पढ्नुहोस्–
नेपालकाे नयाँ नक्सा प्रतिनिधिसभाबाट सर्वसम्मतिमा पारित
