शनिबार बसेको सत्ताधारी नेकपाको सचिवालयको बैठकमा ३८ पृष्ठको ५३ बुँदे ‘जवाफी प्रस्ताव’ वितरण गरेपछि त्यसको सारांश बताउँदै प्रधानमन्त्री एवं पार्टी अध्यक्ष खड्ग ओलीले कार्यकारी अध्यक्ष प्रचण्डमाथि विभिन्न आक्षेप लगाए । अध्यक्ष प्रचण्डले २८ कात्तिकमा प्रस्तुत गरेको राजनीतिक प्रस्तावलाई ‘आरोपपत्र’ र ‘लाञ्छनाहरूको पुलिन्दा’ को संज्ञा दिँदै आएका ओलीले प्रचण्डको सो दस्तावेज पार्टीमा दर्ता र छलफल हुनै नसक्ने जिकिर शनिबार पनि गरे ।
के–के भने ओलीले ?
प्रचण्डले ‘क्षमायाचना’ गर्दै सो प्रस्ताव फिर्ता नलिए पार्टी एकता कायम रहनु असम्भव हुने धम्की दिँदै यदि बहुमतबाट सो प्रस्ताव पारित गरिए नेकपा विघटन भएर नेकपा (माओवादी केन्द्र) र नेकपा (एमाले) कै स्वरूपमा २०७५ जेठ २ को स्थितिमा फर्कने दावी ओलीले गरे ।
कुनै पनि अधिवेशन–महाधिवेशन नभएको स्थितिमा अहिलेका ‘अन्तरिम’ कमिटीहरूले बहुमत–अल्पमतका आधारमा कुनै निर्णय गरे त्यसलाई आफूले नमान्ने ओलीले बताए ।
के– गरे ओलीले ? के भने प्रचण्डले ?
ओलीका यी अभिव्यक्तिपछि कार्यकारी अध्यक्ष पुष्पकमल दाहाल ‘प्रचण्ड’ बोले । ओलीले यसअघि नै चार पटकसम्म पार्टी फुटाउने कोसिस गरेको प्रचण्डले बताए । ‘पहिलो– केन्द्रीय कमिटीको सफल बैठकपछि आफ्ना गुटका साथीहरुको भेला गरेर प्रचण्ड र माओवादीलाई एकल्याउनुपर्छ र आफ्नो गुटको गतिविधिलाई व्यवस्थितरुपमा अगाडि बढाउनुपर्छ भनेर निर्णय गर्नुभयो । दोस्रो– अध्यादेश ल्याउँदा नै फुटाउने कदम चाल्नुभएको हो । तेस्रो– निर्वाचन आयोगमा एमाले दर्ता गर्नुभयो । चौथो– स्थायी कमिटीको बैठकपछि पनि मदन भण्डारी फाउन्डेसनका गतिविधिलाई वडासम्म लैजान निर्देशन दिनुभयो र फुटका निम्ति संगठनात्मक आधार तयार पार्ने काम गर्नुभयो,’ अध्यक्ष प्रचण्डको भनाइ उद्धृत सचिवालयका एक नेताले भने– ‘जबकि स्थायी कमिटीले कुनै पनि प्रतिष्ठानका गतिविधि बन्द गर्ने भनेको थियो । चार पटक तपाईंले पार्टी फुटाउन खोज्नुभएको छ । तर, हामीले धैर्यतापूर्वक पार्टी एकताको रक्षा गर्दै आएका छौं, रक्षा गर्न अहिले पनि दृढ छौं ।’
राजनीतिक प्रस्ताव र पत्र समेटेर बुकलेट किन प्रकाशित भयो भन्ने ओलीको पश्नबारे प्रचण्डले भने– ‘छलफल–बहसका लागि, पार्टीको बैठकका लागि सहमति जनाउनोस् भनेर पत्र लेखेकै भरमा तपाईंले हामीमाथि आरोपसहितको प्रत्युत्तर लेखेपछि म पनि प्रत्युत्तर र प्रस्ताव लेख्ने ठाउँमा पुगेको हुँ । दोस्रो, अघिल्लो सचिवालय बैठकमा तपाईंले बोलेको कुरा रेकर्ड गरेर बाहिर दिनुभएछ । तपाईंले दिएको प्रत्युत्तर पनि बैठकभन्दा पहिले मिडियामा आयो । त्यो दिन तपाईंले बोलेका कुरा टेपरेकर्ड उतारेर हुबहु मिडियामा गयो भनेपछि के बाँकी रह्यो ? त्यसो भएपछि बरु सबै दस्तावेज अध्ययनका लागि सजिलोका निम्ति एकै ठाउँ राखेको हो । मलाई शंका छ कि आज तपाईंले बोलेको कुरा पनि तपाईंले मिडियाका लागि नै बोल्नुभएको होला ।’
अझै घटेन दम्भ र अहंकार !
ओलीको प्रस्ताव र अभिव्यक्तिले अझै पनि अहंकार र दम्भ देखाएको बैठकमा प्रचण्डले बताए । ‘तपाईंलाई कहिल्यै पनि आफ्नो गल्तीतिर फर्कन मन लाग्दैन, तपाईंको आजको प्रत्युत्तरमा पनि अहंकार र दम्भ छ; तपाईंमा आत्मसमीक्षा गर्ने भन्ने प्रवृत्ति नै रहेनछ, तैपनि तपाईंले प्रत्युत्तर पेस गर्नुभयो– त्यसलाई सकारात्मकरुपमा लिएको छु, छलफल गरौं र पार्टी एकतालाई नै योगदान पुर्याउने गरी निष्कर्ष निकालौं ।’
ओली–प्रचण्ड सवाल–जवाफसम्बन्धी यो खबर बबिता शर्माको बाइलाइनमा इकान्तिपुर डटकमले शनिबार प्रकाशित गरेको छ ।
