शनिबार बसेको सत्ताधारी नेकपाको सचिवालय बैठकमा बोल्दै अध्यक्ष एवं प्रधानमन्त्री खड्ग ओलीले पार्टी फुटाउने चेतावनी दिएका छन् । सचिवालय, स्थायी कमिटी, केन्द्रीय समिति र संसदीय दलमा अल्पमतमा परेका ओलीले ‘विधि र पद्धतिका नाममा अल्पमत–बहुमत गरिए ०७५ जेठ २ मा फर्कने’ भन्दै पार्टी विभाजनको चेतावनी दिएका हुन् ।
०७५ जेठ २ सम्म नेकपा (माओवादी केन्द्र) र नेकपा (एमाले) गरी बेग्लाबेग्लै दुई दल अस्तित्व थिए । ३ जेठ, २०७५ मा ती दुई दलबीच एकता भएर सत्ताधारी नेकपा गठन भएको थियो । शनिबार (१३ मंसिर, २०७७) मा प्रधानमन्त्रीको सरकारी निवास बालुवाटारमा बसेको नेकपाको सचिवालय बैठकमा बोल्दै ओलीले भनेका कुरा उद्धृत गर्दै एक नेताले सुनाए– ‘विधि–पद्धतिका नाउँमा महाधिवेशन नभएसम्म अहिले म बहुमत–अल्पमत मान्दिनँ; विधिबाट पार्टीलाई चलाउने हो भने महाधिवेशनमा पुर्याऊँ, बहुमत–अल्पमत गर्ने हो भने २०७५ जेठ २ मा फर्कौं ।’
‘पार्टी गम्भीर मोडमा छ भन्ने कुरा छर्लङ्ग छ; अध्यक्ष कमरेडले पेस गर्नुभएको संगीन आरोपसहितको प्रस्ताव झुटको पुलिन्दा हो, लान्छना र झुटको पुलिन्दा हो,’ कार्यकारी अध्यक्ष पुष्पकमल दाहाल ‘प्रचण्ड’ सँग जसरी पनि अलग भएरै छाड्ने संकेत गर्दै शनिबारको बैठकमा पनि ओलीले भने– ‘त्यसलाई बैठकमा औपचारिकरुपमा प्रवेश गराउन र छलफल गर्न दिन सकिन्नँ,त्यो अभियोग, लाञ्चनापत्र फिर्ता लिनु पर्दछ; गलत अभियोग लगाएकामा कमरेड प्रचण्डले क्षमायाचना गर्नुपर्छ, त्यसपछि मात्रै पार्टी एकतामा जान सकिन्छ ।’
