सत्ताधारी नेकपाको सम्पूर्ण शक्ति लगाएर प्रधानमन्त्री बनेका खड्ग ओलीले स्वयं अध्यक्ष समेत रहेको पार्टीका सम्पूर्ण निर्णय, नीति, योजना र कार्यक्रम लत्याएर पार्टी र सरकार दुवैतिर आफूखुशी गर्दै आएकोमा संविधानको समेत धज्जी उडाउँदै र लोकतन्त्र तथा जनअभिमत समेतको गम्भीर अपमान गर्दै आइतबार संसद् विघटन गर्न राष्ट्रपतिलाई सिफारिस गरेपछि पार्टीले उनीमाथि अनुशासनको कारबाही गर्ने निर्णय लिएको छ ।
राष्ट्रपतिद्वारा प्रतिनिधिसभा विघटन र वैशाख १७ र २७ मा आम चुनाव समेतको घोषणा गरेपछि आइतबार अपराह्न बसेको सो पार्टीको स्थायी कमिटीको बैठकले ओलीमाथि कारबाही गर्न केन्द्रीय कमिटीमा सिफारिस गर्ने निर्णय लिएको हो । यसअघि स्थायी कमिटीमै रहेका तर सभामुख बन्दा पार्टीको जिम्मेवारीबाट राजीनामा दिएका वरिष्ठ पूर्वमाओवादी नेता कृष्णबहादुर महरालाई स्थायी कमिटीको सदस्यमा पुनर्बहाल गराउने निर्णय समेत आइतबारको स्थायी कमिटीको बैठकले लिएको छ ।
प्रधानमन्त्री ओलीको पछिल्लो कदम असंवैधानिक, अलोकतान्त्रिक, निरंकुश र जनादेशविरुद्ध भएको ठहर गर्दै स्थायी कमिटीले खेद व्यक्त गरेको छ । ओलीको यस कदमका विरूद्ध राजनीतिकसँगै कानुनी उपचार खोज्ने निर्णय भएको बैठकपछि प्रवक्ता नारायणकाजी श्रेष्ठले सञ्चारकर्मीलाई बताए ।
ओलीमाथि कारबाहीका लागि ७ पुसमा केन्द्रीय कमिटीको आकस्मिक बैठक बोलाइएको छ । सोमबार दिउँसो १ बजे नयाँ बानेश्वरमा नेकपा संसदीय दलको बैठक बोलाउने र त्यसलगत्तै ३ बजे स्थायी कमिटीको बैठक पनि बस्ने निर्णय आइतबारको स्थायी कमिटीको बैठकले गरेको छ । प्रधानमन्त्री निवास बालुवाटारमा बसेको बैठकमा ४५ सदस्यीय स्थायी कमिटीका आमन्त्रित ४ सहित ३१ जना सदस्य उपस्थित रहे ।
थप यी समाचार पनि पढ्नुहाेस्–
ओलीले गरे ‘कु’, राष्ट्रपतिद्वारा तत्कालै सदर : वैशाख १७ र २७ मा चुनाव (राष्ट्रपतिको विज्ञप्तिसहित)
प्रचण्ड–माधव पक्षका ७ मन्त्रीले दिए राजीनामा (नामावलीसहित)
