प्रगतिशील रुपान्तरण अभियानअन्तर्गत युवाहरुको एउटा समूह नयाँ शक्तिमा प्रवेश गरेको छ । अभियानको प्रकाशन ‘आजको मूल्यांकन’ मासिकमा क्रियाशील युवाहरुसहित ६४ जना नयाँ शक्ति पार्टीमा प्रवेश गरेको सो पार्टीले जनाएको छ ।
नयाँ शक्तिको केन्द्रीय कार्यालय काठमाडौंमा सोमबार आयोजित एक कार्यक्रममा पार्टी संयोजक डा. बाबुराम भट्टराईले उनीहरुलाई पार्टी प्रवेश गराएका हुन् ।
आजको समाजवादको स्वरुप र प्रयोगको विषयमा बहस गर्दै आइरहेको रुपान्तरण अभियानका अभियन्ता दिपक खड्काको नेतृत्वमा युवाहरु नयाँ शक्तिमा प्रवेश गरेका हुन् । प्रवेश हुनेहरुमा रविन्द्रकुमार श्रेष्ठ, राजकुमार श्रेष्ठ, विकास श्रेष्ठ, राजकुमार बराल, रुपक खड्का, राजेन्द्र सापकोटा, विजय मुडभरी, सुवास नगरकोटी, निराजन रायमाझी, संजयविक्रम शाह, जमुना चौधरी, रमेश रायमाझी लगायत छन् ।
पार्टी प्रवेश गर्ने युवाहरुलाई स्वागत गर्दै संयोजक भट्टराईले युगले नै एउटा नयाँ विकल्प खोजिरहकाले त्यो विकल्प निर्माण गर्ने जिम्मेवारी युवाहरुको काँधमा आएको भन्दै अबको राजनीतिमा युवासक्रियता बढ्नुपर्ने आवश्यकता औंल्याए । ‘हामी वैकल्पिक पार्टी मात्र होइन, वैकल्पिक राजनीतिक धारलाई नै अघि बढाउने पार्टी हौं’ उनले भने– ‘हामी केवल थप एउटा पार्टी होइनौं, वैकल्पिक सोच, संस्कार र संस्कृति निर्माण गर्ने पार्टी हौं ।’
उनले नयाँ शक्ति पार्टी निर्माणकै क्रममा रहेकाले यस्तै धु्रवीकरणकै पक्षलाई तिव्रता दिएर वैकल्पिक शक्ति निर्माण गर्ने अभियानमा रहेको बताउँदै भने– ‘विभिन्न पक्षहरुसँग कुराकानी गरेर ध्रुवीकरणलाई तीव्रता दिने हाम्रो योजना हो । यो कुनै बनिबनाउ पार्टी होइन ।’
संयोजक भट्टराईले कुनै पनि समाजको विकासमा तत्कालीन राजनीतिक उपरिसंरचना र आर्थिक आधारबीच निरन्तर जारी रहने संघर्षले गति पैदा गर्ने उल्लेख गर्दै नेपालमा पछिल्लो राजनीतिक परिवर्तनसँगै राजनीतिक उपरिसंरचनाको पाटो पूरा भइसकेकाले अब आर्थिक आधारको विकास गर्नुपर्नेमा जोड दिए । त्यसरी निर्माण हुने आर्थिक आधारले नै समुन्नत समाजवादको आधार तयार गर्ने भन्दै उनले भने– ‘अहिलेको आवश्यकता त्यही आर्थिक आधार परिवर्तन र उत्पादक शक्तिको विकास भएकाले त्यसैमा जोड दिनुपर्छ । यसैबाट समुन्नत प्रकारको समाजवादको आधार तयार हुनेछ ।’
समुन्नत समाजवादको गन्तव्यमा पुग्नका लागि आर्थिक विकास र समृद्धिको चरणबाट पार हुनुपर्ने भएकाले त्यसका लागि युवाशक्तिको आवश्यकता अपरिहार्य रहेको उनले बताए । नयाँ शक्तिमा प्रवेश गरेका युवाहरुले नयाँ शक्ति पार्टीले लिएको युवाकेन्द्रित नीति तथा देशको विकास र समृद्धिको एजेन्डाप्रति आकर्षित भएर आफूहरु प्रवेश गरेको बताए ।
