केही दिन अघिसम्म सहरी विकास मन्त्री प्रभु साहका स्वकीय सचिव रहेका सियाराम कुश्वाहा (फिरोज) रौतहटको कटहरिया नगरपालिकाका मेयर बनेका छन् ।
नेपाली कांग्रेसका अजय प्रकाशलाई भारी मतले पराजित गरी मेयरमा निर्वाचित भएका कुश्वाहाले ४ हजार २ सय ३३ मत प्राप्त गरे । उनका निकटतम प्रतिद्वन्द्वी नेपाली कांग्रेसका अजय प्रकाशले ३ हजार ६ सय ८२ मत प्राप्त गरे ।
कटहरिया नगरपालिकाको उपमेयरमा समेत सयलदेवी यादवलाई पराजित गर्दै माओवादी केन्द्रकै नुरजहाँ खातुन विजयी भएकी छन् । माओवादी केन्द्रको भ्रातृसंगठन योङ कम्युनिस्ट लिग (वाईसीएल) का केन्द्रीय सचिव समेत रहेका कुश्वाहा त्यस क्षेत्रका लोकप्रिय युवानेता हुन् ।
रौतहटको व्यापारिक केन्द्रको रुपमा परिचित कटहरियालाई स्थानीय तहको निर्वाचनमा विशेष महत्वका साथ हेरिएको थियो ।
स्थानीयवासीले ‘विकासपुरुष’ को संज्ञा दिएका माओवादी केन्द्रका नेता तथा सहरी विकास मन्त्री प्रभु साहको निर्वाचन क्षेत्रमा पर्ने भएकाले पनि कटहरियालाई विशेष चासोका रुपमा हेरिएको हो ।
