नक्कली सशस्त्र प्रहरी बनेर ठगी गर्ने एक महिलालाई महानगरीय प्रहरी वृत्त बालाजुले पक्राउ गरेको छ ।
सशस्त्र प्रहरीमा जागिर लगाइदिन्छु भनी विभिन्न व्यक्तिसँग लाखौं ठगी गर्ने सिन्धुपाल्चोक घर भई बालाजु बस्ने कोपिला बोहरालाई सोमबार वृत्तले बालाजुबाट पक्राउ गरेको हो ।
वृत्तका प्रमुख विश्वराज खड्काका अनुसार बोहराले सशस्त्र प्रहरी बलको प्रहरी सहायक निरीक्षक हुँ भनी सशस्त्र प्रहरीको पोशाक लगाई फोटो देखाएर ठगी गरेको अनुसन्धानमा खुल्न आएको छ । बोहराले झन्डै ७ लाख रूपैयाँ ठगी गरेको जानकारी पोखरेलले दिए ।
दैलेख घर भएकी राधा शाहीसँग १ लाख ४५ हजार, सिन्धुपाल्चोककी रेणुका भण्डारीसँग ५० हजार, विमला खड्कासँग १५ हजार, जुनाकुमारी खड्कासँग १२ हजार र मीना सुनुवारसँग १९ हजार रूपैयाँ बोहराले ठगेकी छन् ।
उनीबाट पीडित अन्य व्यक्तिहरू समेत सम्पर्कमा आउने क्रम जारी रहेको वृत्तले जनाएको छ ।
