हज यात्रामा जाने १ सय ५० जना मुस्लिम धर्मावलम्बीलाई बिदार्इ गरिएको छ ।
राजविराज– ३, मोहम्मदपुरस्थित दारुल उलुम मदरसाले आयोजना गरेको कार्यक्रममा स्थानीयवासीले उनीहरुलाई बिदाइ गर्दै सुख, समृद्धि, शान्ति र आपसी भाइचाराका लागि कामना गर्न आग्रह गरेका मदरसाका प्रमुख मोहम्मद जमिरले बताए ।
मक्का मदिनाको दर्शनपछि अञ्जानमा भएका पापबाट मुक्ति पाउनुका साथै सुख, शान्ति र समृद्धि हुने भएकाले यस वर्ष हज गर्न मक्का जान लागेको स्थानीय मोहम्मद इद्रिस मियाँले बताए । मुस्लिम तीर्थालुको पवित्र स्थल मक्का मदिनामा हजका लागि यस पटक ठूलो संख्यामा महिलाहरु पनि जान लागेकामा सप्तरी जिल्लाबाट ६५ महिलासहित १ सय ५० जना सहभागी भएका छन् ।
उनीहरु आइतबारै २ वटा रात्रिबस तथा ७ वटा साना गाडी रिजर्भ गरी सदरमुकाम राजविराजबाट काठमाडौंतर्फ प्रस्थान गरेका छन् । रासस
