आइतबार साँझपख अपहरित एक ११ वर्षीय बालकको खोजीका क्रममा प्रहरी र अपहरणकारीबीच ‘दोहोरो मुठभेड’ (इन्काउन्टर) हुँदा २ जना अपहरणकारीले ठाउँका ठाउँ ज्यान गुमाएका छन् ।
यद्यपि अपहरणकारीले अपहरित ११ वर्षीय निशान खड्काको हत्या गरेको, उनको ज्यान जोगाउन भने नसकिएको जानकारी प्राप्त भएको छ ।
भक्तपुरस्थित डोलेश्वरमा महानगरीय अपराध अनुसन्धान महाशाखाको टोलीले गोली चलाउँदा अपहरणकारी अजय तामाङ र गोपाल तामाङको मृत्यु भएको छ । जंगलमा दोहोरो भिडन्तका क्रममा उनीहरुको मृत्यु भएको महानगरीय प्रहरी आयुक्तको कार्यालयका प्रमुख डीआईजी मनोज न्यौपानेले जनाएका छन् ।
घटनास्थलबाट १ पेस्तोल, २ राउन्ड गोली र बालकको परिवारलाई धम्क्याउन अपहरणकारीले प्रयोग गरेको मोबाइल बरामद भएको महानगरीय अपराध अनुसन्धान महाशाखाका प्रमुख एसएसपी धिरजप्रताप सिंहले जनाएका छन् ।
