भूकम्पले भत्किएको घर पुनर्निर्माण सुरु गरी दोस्रो किस्ता रकम प्राप्तिका लागि फारम भर्न जाँदा वडा कार्यालयमा खटिएका प्राविधिकले ‘म्याद सकियो, फारम नभर्नोस्’ भनी फर्काइदिएको गुनासो पीडितले गरेका छन् ।
बनेपा नगरपालिका– १३, बुढाथोकीगाउँकी मीठू बुढाथोकी पहिलो किस्ताले जग निर्माण गरी दोस्रो किस्ताको फारम भर्न साताअघि वडा कार्यालय पुगिन् । वडा कार्यालयमै खटिएका सहायक इञ्जिनियर प्रवीणकुमार यादवले ‘म्याद सकियो’ भनेपछि आफू फारम नभरी फर्किएको उनले बताइन् ।
इञ्जिनियर यादवले सरकारी समाचार एजेन्सी रासससँग कुरा गर्दै दोस्रो किस्ताको ‘फारम नभर्नू’ भन्ने खबर ‘माथि’ बाटै आएकाले फारम नभरिएको स्वीकारेका छन् । राष्ट्रिय पुनर्निर्माण प्राधिकरण निर्देशक समितिको चैतको बैठकले दोस्रो किस्ता असार मसान्तसम्म लिइसक्नुपर्ने निर्णय गरेको थियो ।
प्राधिकरणमा प्रमुख कार्यकारी अधिकृतको पद रिक्त भएको एक महिना बितिसक्दा पनि नियुक्त नगरिएकाले म्याद थप गर्ने निर्णय हुन सकेको छैन । प्राधिकरणको निर्णय वडासम्म नआउँदा कार्यालय नै के गर्ने भन्ने अन्योलमा रहेको वडाध्यक्ष सूर्यनारायण नापितले बताए ।
वडा कार्यालयमा सम्पर्क गर्न पीडितहरु आउने भए पनि वडासँगै जानकारी नहुने गरेको उनले सुनाए । प्राधिकरणका सहप्रवक्ता मनोहर घिमिरेले भने ‘…काम जारी राख्न निर्देशन दिइसकिएको’ बताए ।
