डडेल्धुरा–डोटी जोड्ने डा. केआई सिंह राजमार्गको रडुवा खोलामा बिहीबार साँझ भएको शिखर नगरपालिकास्थित पिसजोन एकेडेमी स्कुल बस दुर्घटनामा ज्यान गुमाएका १८ जनाको सनाखत भएको छ ।
ट्राफिक प्रहरी पोस्ट डडेल्धुराका प्रमुख प्रहरी नायब निरीक्षक गणेश नागारीले दिएको जानकारी अनुसार दुर्घटनामा ज्यान गुमाउनेहरुमा कैलालीको गोदावरी नगरपालिका– २ का २१ वर्षीय केशव कडायत, सोही नगरपालिका– १० की २० वर्षीया शारदा कडायत, डोटीको शिखर नगरपालिका– ७ का २२ वर्षीय योगेन्द्र बोहरा, सोही नगरपालिका– ७ का २४ वर्षीय शङ्कर जोरा, सोही नगरपालिका– ८ की २२ वर्षीया शारदा रावत, कैलालीको धनगढी उपमहानगरपालिका– २८ का नारायण चौधरी, डोटीको दिपायल सिलगढी नगरपालिका– ४ की ३५ वर्षीया शशी विक, सोही नगरपालिका– ११ की २५ वर्षीया गोदा भाट, सोही नगरपालिका– ८ का ४० वर्षीय कैलाश रावल, सोही ठाउँका ४० वर्षीय योगेन्द्र रावलको सनाखत भएको छ ।
त्यसैगरी, डडेल्धुराको नवदुर्गा गाउँपालिका– ३ का २२ वर्षीय चक्र धामी, डोटीको शिखर नगरपालिका– १० का रोहित बलायर, डडेल्धुराको गन्यापधुरा– ३ की ३० वर्षीया माया रावल, कैलालीको गोदावरी– १० का पुरन कठायत, डडेल्धुराको नवदुर्गा गाउँपालिका– ३ का १७ वर्षीय तिलक खाती, सोही ठाउँका ३० वर्षीय तेज धामी, डोटीको शिखर नगरपालिका– १० का १५ वर्षीय सागर बलायर, सोही नगरपालिका– ११ का २४ वर्षीय पदम विकको पनि सनाखत भएको छ ।
डोटीको शिखर नगरपालिका, बानीडुग्री सैनस्थित पिसजोन एकेडेमी नामक स्कुलको बस अमरगढी नगरपालिकास्थित उग्रतारा मेलाबाट फर्कंदा दुर्घटना भएको हो । ज्यान गुमाएकाहरुको डडेल्धुरास्थित उपक्षेत्रीय अस्पतालमा पोस्टमार्टम गरिने तयारी भएको जिल्ला प्रहरी कार्यालय डडेल्धुराका प्रहरी निरीक्षक खगेन्द्र साउदले जानकारी दिएका छन् । सो दुर्घटनामा १८ जनाको ज्यान गएको छ भने २६ जना घाइते भएका छन् ।
घाइतेमध्ये गम्भीर अवस्थामा रहेका ११ जनालाई थप उपचारका लागि कैलालीतर्फ पठाइएको छ । २ जनालाई डिस्चार्ज गरिएको छ भने १३ जनाको उपक्षेत्रीय अस्पताल डडेल्धुरामा उपचार भइरहेको छ । स्कुलका सञ्चालक भीम बलायरले परिवारसहित स्कुलका अन्य संस्थापक समेत लिएर मेला हेर्न गएको र फर्कने क्रममा स्याउलेभन्दा तलपट्टिबाट यात्रु समेत बोकेर गएको बुझिएको ट्राफिक प्रहरी पोस्ट डडेल्धुराका प्रहरी नायब निरीक्षक गणेश नागारीले जानकारी दिएको राससले जनाएको छ ।
