बहुचर्चित मेलम्ची खानेपानी आयोजनाको बाँकी काम पूरा गर्ने विषयमा सरकारले दुई वटा विकल्पबारे छलफल गरिरहेको खानेपानी मन्त्री विना मगरले बताएकी छन् ।
प्रतिनिधिसभाको बैठकमा सांसदहरुले सोधेका प्रश्नहरुको शुक्रबार जवाफ दिँदै सरकारले चाँडोभन्दा चाँडो मेलम्चीको पानीलाई काठमाडौं ल्याउन दुई वटा विकल्पमा छलफल गरिरहेको मन्त्री मगरले बताइन् ।
ठेक्का सम्झौता तोडेको इटलियन कम्पनी सीएमसीलाई पुनः काममा फिर्ता बोलाउने वा नयाँ ठेक्का प्रक्रिया गरेर मेलम्ची आयोजनालाई छिटोभन्दा छिटा सक्ने विषयमा छलफल भइरहेको जानकारी मन्त्री मगरले दिइन् ।
‘दुई वटा विषयलाई सँगसँगै लैजान खोजेका छौं,’ मन्त्री मगरले भनिन्– ‘सीएमसी आउँछ भने नेपाली भेन्डर समस्या समाधान गर्न सक्छौं ऊ आयो भने अलि चाँडो काम हुन्छ र विधिसम्मत रुपमा सीएमसी आउँछ भने स्वागत गर्न सरकार तयार छ ।’
