सूर्यविनायक नगरपालिका– ८, सिपाडोल, आदर्श बस्ने २६ वर्षीय निकेश भुजु आफैंले चलाउने ट्याक्सीमा मृत अवस्थामा फेला परेका छन् ।
आफैंले चलाउँदै आएको बा ५ च ६४२१ नम्बरको ट्याक्सी बनाउने भन्दै घरबाट बिहान निस्किएका भुजुलाई प्रहरीले भक्तपुर नगरपालिका– ८, लिवालीमा रोकिराखेको आफ्नै गाडीभित्र मृत अवस्थामा भेटेको महानगरीय प्रहरी परिसरले जनाएको छ ।
बिहान निस्किएका श्रीमान् घर नआएका र मोबाइल समेत सम्पर्क नभएपछि श्रीमती सिर्जनाले प्रहरीलाई जानकारी गरार्इ आफैंले समेत खोजी गर्ने क्रममा लिवालीमा गाडी देखेपछि प्रहरी पुग्दा अचेत अवस्थामा भुजुलाई देखी भक्तपुर अस्पताल लैजाँदा मृत्यु भइसकेको जानकारी गराइएको प्रहरी उपरीक्षक हिमालयकुमार श्रेष्ठले जानकारी दिए ।
प्रहरी र श्रीमती सिर्जना लिवाली पुग्दा ट्याक्सी नजिकबाट भाग्दै गरेका चार जनालाई प्रहरीले पक्राउ गरी अनुसधान सुरु गरेको उनले जानकारी दिए । पक्राउ पर्नेमा चाँगुनारायण नगरपालिका– ८ का २५ वर्षीय सुमन बाला, दाङ हापुर गाउँपालिका– ४ का १९ वर्षीय भूपबहादुर रोका, सिन्धुपाल्चोक मार्मिङ गाउँपालिका– १, ट्याङ्थली घर भई हाल चाँगुनारायण– ९, ताथली बस्ने २६ वर्षीय किरण श्रेष्ठ र ताथलीकै २१ वर्षीय सुकु भन्ने राज वनमाला रहेका छन् । प्रहरीले शव परीक्षण गर्न शिक्षण अस्पताल पठाएको खबर राससले प्रेषित गरेकाे छ ।
