बुधबार दिउँसो ताप्लेजुङमा भएको हेलिकप्टर दुर्घटनामा संस्कृति, पर्यटन तथा नागरिक उड्डयनमन्त्री एवं नेपाल कम्युनिस्ट पार्टी (नेकपा) का प्रभावशाली युवानेता रविन्द्र अधिकारीसहित त्यसमा सवार ७ जना सबैको निधन भएको छ ।
नेकपाका महासचिव विष्णु पौडेलले दुर्घटनामा मन्त्री अधिकारीको निधन भएको पुष्टि गरेका छन् । तेह्रथुमको चुहानडाँडा एयरपोर्टको निरीक्षणलगत्तै पर्यटन मन्त्री अधिकारी सहितको टोली पाथीभरा मन्दिरको दर्शनमा गएको थियो । पाथीभराबाट फर्कने क्रममा हेलिकप्टर दुर्घटना भएको हो ।
दुर्घटनाग्रस्त हेलिकप्टरको अधिकांश भाग जल्नुका साथै टुक्रा–टुक्रा भएको छ । निकै पछिसम्म पनि आगो बलिरहेको छ ।
