बुधबार ताप्लेजुङको पाथीभरा मन्दिर नजिकै भएको हेलिकप्टर दुर्घटनामा निधन भएका संस्कृति, पर्यटन तथा नागरिक उड्डयनमन्त्री रवीन्द्र अधिकारीसहित ७ जनाको पोस्टमार्टम सकिन बिहीबार राति अबेरसम्म लाग्ने देखिएको छ ।
पोस्टमार्टमको समय लम्बिएसँगै बिहीबार अपराह्न ३ बजेका लागि निर्धारित टुँडिखेलको श्रद्धाञ्जली कार्यक्रम शुक्रबार बिहान ८ बजेसम्मका लागि स्थगित भएको छ । बिहीबार दिउँसो मन्त्री अधिकारीसहित सबैको शव काठमाडौं ल्याइपुइएको थियो । लगत्तै नेकपाको स्थायी समितिले दिउँसो ३ बजे श्रद्धान्जलिको कार्यक्रम सार्वजनिक गरेको थियो ।
बिहीबार ३ बजेपछि चिकित्सकहरुले सातै जनाको पोस्टमार्टम सकिने अझै ४–५ घन्टा लाग्ने बताएपछि श्रद्धाञ्जलिसभा शुक्रबार बिहान ८ बजे हुनेगरी बिहीबारको कार्यक्रम स्थगित गरिएको छ ।
