कोशी गाउँपालिका– ८, नेहरु पार्कमा शुक्रबार गाडीको ठक्करबाट मोटरसाइकलमा सवार बाबुको मृत्यु हुनुका साथै छोरा घाइते भएका छन् ।
पूर्व–पश्चिम राजमार्गमा पूर्वबाट पश्चिमतर्फ जाँदै गरेको को ३३ प २०५१ नम्बरको मोटरसाइकललाई विपरीत दिशाबाट आउँदै गरेको बा ५ ख ७११६ नम्बरको हायसले ठक्कर दिएको थियो ।
हायसको ठक्करबाट मोटरसाइकलको पछाडि सवार सप्तकोशी नगरपालिका– ३, फत्तेपुर, सप्तरीका ६० वर्षीय अम्मरबहादुर थापाको मृत्यु भएको हो भने उनका छोरा ३८ वर्षीय मोटरसाइकल चालक मोहनराज घाइते भएका हुन् ।
दुर्घटनामा घाइते दुवैलाई उपचारका लागि जिल्ला अस्पताल इनरुवा ल्याइएकोमा गम्भीर घाइते बाबुको उपचारकै क्रममा मृत्यु भएको छ भने छोराको अवस्था सामान्य रहेको सुनसरीका प्रहरी नायब उपरीक्षक ज्ञानेन्द्रप्रसाद फुयाँलले जानकारी दिएका छन् ।
दोरम्बा गाउँपालिका– ७, थापागाउँ, रामेछापका ४२ वर्षीय हायस चालक राम तामाङ र गाडी जिल्ला प्रहरी कार्यालय सुनसरीको नियन्त्रणमा रहेको प्रहरी नायब उपरीक्षक फुयाँलले बताएको खबर राससले प्रेषित गरेको छ ।
