नेत्रविक्रम चन्द ‘विप्लव’ नेतृत्वको नेपाल कम्युनिस्ट पार्टीले स्थानीय सरकारका प्रमुख, उप्रमुखलगायत वडाध्यक्षसम्मलाई पदबाट राजीनामा दिन पत्राचार गर्नुका साथै चन्दा मागेर धम्की दिएको दावी गरेका छन् ।
उनीहरुले पत्र मात्र नभई फोनबाट समेत चन्दाको बारेमा कुराकानी गर्ने गरेपछि ‘सुरक्षा चुनौती बढ्न सक्ने’ भन्दै स्थानीय सरकार प्रमुखहरुले कर्णाली प्रदेशका प्रहरी प्रमुख महेशविक्रम शाहलाई सुरक्षा चुनौती देखिएका संवेदनशील स्थानमा सुरक्षाबल बढाउन र सुरक्षा निकाय सचेत हुन आग्रह गरेका छन् ।
यस्ता फोन र धम्की अहिले दैलेखका ११ वटै स्थानीय तहका प्रमुख, उपप्रमुख र वडाध्यक्षसम्मलाई आएको दैलेखका स्थानीय सरकार प्रमुखहरुले बताए । दैलेखका स्थानीय सरकारका प्रमुखहरुलाई ढुक्क भएर बस्न आग्रह गर्दै प्रदेश प्रहरी प्रमुख शाहले भने– ‘तपाईंहरु जनताबाट निर्वाचित जनप्रतिनिधि हुनुहुन्छ, ढुक्क भएर बस्नुहोस्, अराजक गतिविधि गर्ने जो–कोहीलाई प्रहरीले विशेष ढङ्गले खोजी गरिरहेको छ ।’
मुलुक समृद्धितर्फ अगाडि बढ्ने महान् अभियानलाई कसैले पनि अवरोध गर्नु नहुने भन्दै संविधानविपरीत कार्य गर्ने सबैलाई कारबाही गर्न सरकार तयार रहेको उनले बताए । विप्लवका गतिविधिलाई सबै मिलेर निस्तेज पार्न सकिने उनको भनाइ छ । संविधानमा लेखिएका कुराविरुद्ध अहिले ‘विप्लव समूह’ अगाडि बढेको भन्दै बम विस्फोट, व्यक्ति हत्याजस्ता गतिविधिमा ‘विप्लव समूह’ सक्रिय रहेको उनले उल्लेख गरे ।
संविधानले निषेध गरेका कुरा गर्ने राजनीतिक समूह नभएर आपराधिक समूह भएको भन्दै प्रहरीले यस्ता गतिविधिको नियन्त्रण गर्ने र यस्ता गतिविधिमा संलग्नलाई पक्राउ गरी कारबाही प्रक्रियाका लागि कडा कदम चाल्ने उनले बताएको खबर राससले प्रेषित गरेको छ ।
