पाँचथरको मिक्लाजुङ गाउँपालिका– ७, लिम्बामा रोकेर राखिएको स्काभेटरमा बिहीबार बिहान आगजनी भएको छ । लिम्बास्थित लेकगाउँमा राँके–रवि–भेडेटार सडक निर्माणका लागि प्रयोग भइरहेको ज्वाला निर्माण सेवा प्रालिको बा ३ क ५६६ नम्बरको स्काभेटरमा अज्ञात समूहले आगजनी गरेको प्रहरीले जनाएको छ ।
जिल्ला प्रहरी कार्यालयका प्रहरी निरीक्षक अनिलकुमार पौडेलका अनुसार बाटामा रोकेर राखिएको उक्त स्काभेटरमा बिहान करिव २ बजे आगजनी भएको हो । घटना कसले, किन गरायो भन्ने अहिलेसम्म यकिन हुन नसकेको प्रहरीको भनाइ छ ।
स्काभेटरमा आगलागी भएको स्थानीयवासीले खबर गरेपछि प्रहरीले बिहानैदेखि सो घटनाका सम्बन्धमा अनुसन्धान थालेको प्रहरी निरीक्षक पौडेलले जानकारी दिए । आगजनीका कारण स्काभेटरका पाटपुर्जा जलेको खबर राससले प्रेषित गरेको छ । फाेटाेः फाइल तस्बिर
