गोरखाको वीरिन्चोकस्थित श्री रत्नराज्य उच्च माविबाट २०६८ मा एसएलसी दिएको ब्याचकी पूजा थापा मगर बोनम्यारोको रोगबाट ग्रस्त भएपछि उपचारार्थ उनका सहृदयी सहपाठीहरुले भरमग्दुर प्रयास गरे । काठमाडौंमा नीराजन पोखरेल र शान्ता बस्याल तथा विदेशमा प्रदीप रेग्मी र रमेश बयलकोटीको अगुवाईमा सामाजिक सञ्जाल तथा अन्य माध्यमहरुको प्रयोग गरी २ लाख ३९ हजार ३ सय ९५ रुपैयाँ जम्मा भयो ।
तर, विडम्बना ! पति साजन थापा मगरको भरमग्दुर प्रयासका बाबजुद पूजा थापाको स्वास्थ्य सुध्रन सकेन र अन्ततः उनको दुःखद निधन भयो । आ–आफ्नै अनेकथरी समस्या, दुःख र कष्टका बाबजुद सहपाठीहरुले स्वदेश–विदेशमा संकलन गरेको आर्थिक सहयोग पनि काम लागेन ।
पूजाको निधनसँगै उनकी नाबालक छोरी मातृवात्सल्यबाट वञ्चित हुने नै भइन् । पति साजनसहित थापा परिवार मर्माहत नहुने पनि कुरै भएन । पूजाको स्वास्थ्योपचारका निम्ति आर्थिक संकलन गरेका सहपाठीहरु पनि मर्माहत भए । र, अन्ततः उनीहरुले संकलन गरेको रकम मंगलबार राजधानीस्थित एसबीआई बैंकमा मुद्धति खाता खोलेर उनकी छोरी सजिनाको उच्च शिक्षाका निम्ति जम्मा गरिदिए ।
