राजधानीको बालुवाटारस्थित नेपालको एक चर्चित इन्टरनेट सेवा प्रदायक कम्पनी ‘सुविसु’ को कार्यालयमा बुधबार दिउँसो लागेको आगो निकै बेरपछि नियन्त्रणमा आयो । आगो नियन्त्रणका लागि नेपाल प्रहरी, नेपाली सेना र काठमाडौं, भक्तपुर तथा ललितपुरका वारूणयन्त्रहरू परिचालन गरिए ।
महानगरीय प्रहरी परिसर काठमाडौंका डीएसपी होविन्द्र बोगटीका अनुसार जेनरेटर सञ्चालनमा लागि आवश्यक पर्ने इन्धन भण्डारण गरिएको कोठाबाट आगलागी सुरु भएको थियो । आगो निभाउन नेपाल प्रहरी, नेपाली सेनालगायतको दमकल प्रयोग गरिए पनि पेट्रोल–डिजेलबाट लागेको आगो पानी हालेर निभाउन निकै हम्मे परेको थियो । आगो निभाउन त्रिभुवन अन्तर्राष्ट्रिय विमानस्थलबाट समेत दमकल बोलाइएको डीएसपी बोगटीले बताए ।
आगो नियन्त्रणमा नआउँदासम्म बालुवाटार क्षेत्रमा यातायात सञ्चालनमा रोक लगाइयो । ‘सुविसु’ को मुख्य सर्भर रहेको भवनमा बुधबार दिउँसो पौने १ बजे आगलागी सुरू भएको थियो । आगलागीपछि सुविसुका इन्टरनेट तथा केबल टिभी सेवा अवरुद्ध भएका छन् । जेनरेटर नजिकै डिजेल स्टक रहेको र त्यस नजिकै विद्युत लाइन सर्ट भएर आगलागी भएको प्रारम्भिक अनुमान छ ।
