आत्महत्या गरेका पत्रकार शालिकराम सुवेदीलाई ‘आत्महत्या दुरुत्साहन’ गरेको आरोपमा प्रहरी हिरासतमा राखी अनुसन्धान भैरहेका टेलिभिजन कार्यक्रम प्रस्तोता रवि लामिछानेकी श्रीमती निकिता पाैडेलले दुई सञ्चारकर्मी र एक प्रहरी अधिकृतविरुद्ध जाहेरी दर्ता गराउने प्रयास गरेकी छन् ।
शालिकरामको आत्महत्यासम्बन्धी भिडियो किर्ते गरेको भन्दै निकिताले जनआस्था साप्ताहिकका सम्पादक एवं प्रेस काउन्सिल नेपालका कार्यवाहक अध्यक्ष किशोर श्रेष्ठ, नेपाल आज नामक अनलाइनका सम्पादक संकेत कोइराला र जिल्ला प्रहरी कार्यालय चितवनका प्रमुख एसपी दानबहादुर मल्लविरुद्ध जाहेरी दर्ता गराउने प्रयास गरेकी हुन् । मुलुकी अपराध संहिता, २०७४ को दफा २७६ र ७७ अनुसार जाहेरी दर्ता गर्न निवेदन बोकेर बुधबार महानगरीय प्रहरी परिसर काठमाडौंमा पुगेकी निकिताको निवेदन कार्यालय प्रमुख र उपप्रमुख नभेटिएकाले दर्ता हुन नसकेको जानकारी निकिता पौडेलका अधिवक्ता राजेन्द्र सेढाईंले दिए ।
चितवनको नारायणगढ बसपार्कस्थित होटल कंगारुमा झुन्डिएको अवस्थामा साउन २० मा मृत फेला परेका पुडासैनीलाई आत्महत्या गर्न दुरुत्साहन गरेको अभियोगमा प्रहरीले बिहीबार रवि लामिछानेसहित युवराज कँडेल र अस्मिता कार्कीलाई पक्राउ गरी अनुसन्धान गरिरहेको छ ।
