नेपालमा फेरि राजतन्त्र फर्काउने कुराको वकालत गर्दै त्यसैका पक्षमा अभियान चलाइरहेको ‘नेपालका लागि नेपाली अभियान’ नामक एनजीओको कार्यक्रममाथि चितवनमा युवाहरुले हमला गरी बिफल पारिदिएका छन् । पछिल्लो समय विभिन्न उटपट्याङ गर्दै र उग्र तथा अराजक अभिव्यक्ति दिँदै चर्चामा आएका विवादास्पद र सन्देहास्पद युवा ज्ञानेन्द्र शाहीमाथि समेत त्यसै सन्दर्भमा कुटपिट भएको छ ।
आफूलाई ‘नेपालका लागि नेपाली अभियान’ कै एक अभियन्ता बताउने र सो ‘अभियान’ कम्पनी रजिष्ट्रारको कार्यालयमा दर्ता गरिएको भिडियो अन्तर्वार्ता समेत दिएका ज्ञानेन्द्र शाहीमाथि सत्तापक्षका कार्यकर्ताले सांघातिक आक्रमण गरेको सो पक्षको दावी छ ।
शाहीलाई सत्तारुढ नेकपाका कार्यकर्ताहरुले निर्घात कुटेको र उनको शरीरका ठाउँ–ठाउँमा चोटपटक लागेको उक्त ‘अभियान’ सम्बद्ध एक बौद्धिकले न्युजकोसेलीलाई बताए । चितवनको चौबिसकोठीमा आयोजित ‘खबरदारी सभा’ मा सहभागी हुन होटल ग्लोबलबाट निस्किएर गाडीमा चढेका शाहीमाथि सत्तारुढ दलनिकट विद्यार्थीहरुको झुण्ड जाइलागेको उनले बताए ।
‘राजावादीलाई कार्यक्रम गर्न दिँदैनौं’ भन्दै युवाहरुले कार्यक्रम बिथोलेका हुन् । कार्यक्रम सञ्चालन गर्न थालेपछि युवाहरुले ज्ञानेन्द्र शाहीको ब्यानरलगायतका सामग्री फालिदिएका थिए । युवाहरूको सोही समूहले ज्ञानेन्द्र शाही चढेको गाडीमा समेत तोडफोड गरेको बताइएको छ ।
