रुपनी गाउँपालिका– १, रामपुर, सप्तरीस्थित विशेश्वर यादवको गोठमा बाँधेको भैंसीको डोरी (दाम्लो) खोलेर चोरी गर्दै गरेको अवस्थामा प्रहरीले सोमबार साँझ तीन जनालाई पक्राउ गरेको छ ।
भैंसी चोरी गर्दै गरेको अवस्थामा बोदेबर्साइन नगरपालिका– ५, सप्तरीका २६ वर्षीय मोहम्मद रफिल मियाँलाई नियन्त्रणमा लिइएको छ । उनलाई नियन्त्रणमा लिएर सोधपुछ गर्दा उनले अरू साथी समेत चोरीमा संलग्न रहेको बयान प्रहरीलाई दिएको आधारमा थप दुई जनालाई पनि पक्राउ गरिएको प्रहरी नायब उपरीक्षक तिलक भारतीले बताएका छन् ।
सो क्रममा खोजतलास गर्दै जाँदा ज १ च १२०१ नम्बरको पिकअपसहित भैंसी लोड गर्न रुपनी चोकमा बसिराखेको अवस्थामा महेशपुर पतारी गाउँपालिका– ४, सिरहाका ३५ वर्षीय नसरुल मियाँ र गणेशमान चारनाथ नगरपालिका, धनुषाका २८ वर्षीय नारायण बुढाथोकीलाई पिकअपसहित पक्राउ गरिएको प्रहरीले जनाएको छ ।
