दीपावली दिन (कात्तिक ११ मा) चक्कु प्रहारबाट गम्भीर घाइते भएका वीरेन्द्रनगर नगरपालिका– १० का ३० वर्षीय चन्दन रानाको उपचारका क्रममा मृत्यु भएको छ ।
उपचारकै क्रममा बिहीबार बेलुका भारतको लखनउमा रानाको मृत्यु भएको जिल्ला प्रहरी कार्यालयका प्रवक्ता एवं प्रहरी नायव उपरीक्षक रवि रावलले जानकारी दिए । दीपावलीका दिन दीपनगर (सुर्खेत) मा भैलो खेलिरहेका बेला सोही वडा निवासी २९ वर्षीय निर्मल सोनी, १९ वर्षीय केशव खनाल र २२ वर्षीय प्रेम गुरुङले पछाडिबाट टाउकामा चक्कु प्रहार गरी रानालाई सख्त घाइते बनाएको रावलले बताए ।
प्रवक्ता रावलका अनुसार घाइते रानालाई उपचारका लागि कर्णाली प्रदेश अस्पताल सुर्खेत लगिए पनि अस्पतालले नेपालगञ्ज सिफारिस गरेको थियो । नेपालगञ्जमा पनि उपचार हुन नसकेपछि रानाका आफन्तले थप उपचारका लागि लखनउ लगेका थिए ।
रानालाई चक्कु प्रहार गर्ने खनाल र गुरुङलाई प्रहरीले पक्राउ गरिसकेको छ । फरार सोनीको खोजतलास तीव्र बनाइएको प्रहरीले जनाएको खबर राससले प्रेषित गरेको छ ।
