उपचुनावको मौन अवधि सुरु हुनुभन्दा केही अघि सत्ताधारी नेपाल कम्युनिस्ट पार्टी (नेकपा) ले बुधबार दिउँसो पोखरामा आयोजना गरेको चुनावी सभास्थल नजिकै शक्तिशाली बम विस्फोट भएको छ ।
पोखरा महानगरपालिका– ९, प्रदर्शनी केन्द्रमा आयोजित चुनावी सभास्थल नजिकै बम विस्फोट भएको हो । विस्फोटबाट मानवीय क्षति भएको छैन तर एउटा बस भने क्षतिग्रस्त भएको छ । विफोटबाट पार्किङमा रहेको ग १ ख ८८९१ नम्बरको बसका सबैजसो सिसा फुटेका छन् ।
विष्फोट लगत्तै प्रहरी पुगेर घटनास्थललाई घेरा हाली अनुसन्धान सुरु गरेको छ । यसअघि पनि पोखराका विभिन्न स्थानमा नेत्रविक्रम चन्द ‘विप्लव’ नेतृत्वको नेपाल कम्युनिस्ट पार्टीले बम विस्फोट गराएको खबरहरु आइरहेको सन्दर्भमा यो विस्फोट समेत सोही पार्टीले गराएको हुन सक्ने अड्कालबाजी गरिएको छ ।
बुधबारको चुनावी सभामा नेकपाका अध्यक्ष पुष्पकमल दाहाल ‘प्रचण्ड’ तथा नेताहरु वामदेव गौतम, सुवाचन्द्र नेम्वाङ, काठमाडौंका महानगर प्रमुख विद्यासुन्दर शाक्य लगायत सहभागी छन् । मंसिर १४ मा हुन लागेको उपचुनावमा कास्की– २ की उम्मेदवार रहेकी विद्या भट्टराईको पक्षमा मतदाता आकर्षित गर्न शीर्ष नेताहरु पोखरा पुगेका हुन् ।
