नेपालको चर्चित इन्टरनेट सेवा प्रदायक कम्पनी वर्ल्डलिंक कम्युनिकेसन्स प्रा.लि ले दक्षिण एशियाली खेलकुद (साग) हुने सबै रंगशालाहरुमा खेल अवधिभर उच्च गतिको इन्टरनेट सेवा निःशुल्क उपलब्ध गराउने भएको छ ।
प्रयोगकर्ताले आफ्नो मोबाइल नम्बरबाट लगइन गरेर दैनिक १ जीबी डाटा दैनिक रुपमा निःशुल्क प्रयोग गर्न पाउने छन् । वर्ल्डलिंकले यसका लागि फेसबुकको प्लेटफर्म एक्स्प्रेस वाईफाईसँग सहकार्य गरेको छ ।
काठमाडौं र पोखरामा डिसेम्बर १ देखि १० सम्म हुन गइरहेको १३औं एशियाली खेलकुदमा २७ वटा विभिन्न खेलका प्रतियोगिता हुनेछन् । सागमा नेपाल, माल्दिभ्स, भुटान, बंगलादेश, भारत, पाकिस्तान र श्रीलंका गरी ७ देशका खेलाडीले भाग लिएका छन् । मुख्य खेल हुने स्थानहरु– राजधानीको त्रिपुरेश्वरस्थि दशरथ रंगशालाको कभर्ड हल, ललितपुरको सातदोबाटोस्थित स्पोर्टस कम्प्लेक्स, ललितपुरकै लगनखेलस्थित आर्मी फिटनेस सेन्टर, पोखरा रंगशालास्थित कभर्डहलमा वर्ल्डलिंकको निःशुल्क वाईफाई उपलब्ध हुनेछ ।
नेपालका दुर्गम क्षेत्रहरुमा समेत निःशुल्क इन्टरनेट सेवा उपलब्ध गराइरहेको वर्ल्डलिंक नेपालको सबैभन्दा ठूलो इन्टरनेट सेवा प्रदायक कम्पनी हो । हरेक १ लाख प्रयोगकर्ताले ६ हजार वाईफाई स्थानबाट निःशुल्क इन्टरनेट चलाउँछन् । फेसबुकसँग जोडिएर उसको एक्स्प्रेस वाईफाई प्लेटफर्ममार्फत वर्ल्डलिंकले दुर्गममा निःशुल्क वाईफाई वितरण गरिरहेको छ । एक्स्प्रेस वाईफाई विश्वभरका मानिसलाई इन्टरनेटमा जोड्ने फेसबुकको कार्यक्रम हो ।
