केही दिनदेखि चलेको शीतलहरसँगै बढेको चिसोका कारण जनजीवन कष्टकर बनेपछि शनिबारदेखि कैलालीको टीकापुर नगर क्षेत्रमा प्रहरीको पहलमा आगो ताप्ने व्यवस्था गरिएको छ ।
स्थानीय सामुदायिक वनसँग गरिएको समन्वयपछि निःशुल्क दाउरा उपलब्ध भई नगर क्षेत्रका १६ ठाउँमा आगो ताप्ने व्यवस्था मिलाइएको इलाका प्रहरी कार्यालय टीकापुरका प्रहरी नायव उपरीक्षक मनोहरप्रसाद भट्टले बताए । नगरका वासिन्दालाई चिसोबाट बचाउने अभियानस्वरुप आगो ताप्ने व्यवस्था गरिएको भट्टले बताए ।
यसैबीच, नगर क्षेत्रका विद्यालय आसपासका मदिरा पसल तथा होटलबाट ९ सय ५० लिटर अवैध घरेलु मदिरा जफत गरी नष्ट गरिएको छ । बढ्दो लागूऔषधको सेवन र ओसारपसार सामाजिक चुनौतीका रुपमा देखिन थालेपछि यस्ता विकृति न्यूनीकरणका लागि प्रहरीले टीकापुर क्षेत्रमा हरेक दिन ‘विद्यालयमा एक घन्टे कार्यक्रम’ अभियान पनि थालेको छ ।
लागूऔषधको प्रयोगले मानिसको स्वास्थ्य र समाजमा पार्ने असर, बालविवाह गर्दा हुने असरलगायतका विषयमा प्रहरी अधिकृतद्वारा विद्यालयका छात्रछात्रालाई चेतनामूलक प्रशिक्षण दिने गरिएको खबर राससले प्रेषित गरेको छ ।
