वीरेन्द्रनगर नगरपालिका– ३, सुर्खेतमा मङ्गलबार ट्रिपरले किचेर मृत्यु भएका महावै गाउँपालिका– ३, सिमखेत, कालिकोटका २१ वर्षीय केशरबहादुर सिंहका परिवारले बुधबार पनि शव बुझेका छैनन् ।
भे १ ख २२४२ नम्बरको ट्रिपरले भे १ प २१७८ नम्बरको मोटरसाइकलमा सवार सिंहलाई बिहान ८ ठक्कर दिँदा घटनास्थलमै उनको मृत्यु भएको थियो । उनको मृत्युपश्चात् पीडित परिवारको सहमतिविना नै प्रहरीले बल प्रयोग गरेर शव उठाएकोप्रति विरोध गर्दै उनीहरुले बुधबार साँझ साढे ६ बजे सडकमा प्रदर्शन गरे ।
मृतक सिंहको शव कर्णाली प्रदेश अस्पतालको शवगृहमा राखिएको प्रहरीले जनाएको छ । पीडित परिवारले ट्रिपरधनी हरि बीसी नआउन्जेल र उचित क्षतिपूति उपलब्ध नगरुन्जेल शव नबुझ्ने र बिहीबार सडक यातायात बन्द गर्ने तथा सङ्घर्षका अरू कार्यक्रम पनि अघि बढाउने चेतावनी दिएका छन् ।
यता, जिल्ला प्रशासन कार्यालय सुर्खेतले बिहीबारसम्म पीडित परिवारसँग उचित छलफल गरेर समस्या समाधान गर्ने बताएको खबर राससले प्रेषित गरेको छ ।
